Қазақстан Президенті Қасым-Жомарт Тоқаев 2 қыркүйектегі Қазақстан халқына Жолдауын жүзеге асыру бойынша Премьер-министр Асқар Маминнің жалпыұлттық іс-қимыл жоспарын әзірлеу туралы ақпаратын тыңдады.
Мемлекет басшысы еліміз саяси және әлеуметтік-экономикалық реформалардың жаңа кезеңіне аяқ басқанын атап өтті. Оның айтуынша, аталған уәделерді орындау орталық пен өңірлерде, бірқатар заң жобасы мен басқа да нормативтік-құқықтық актілерді әзірлеуді қоса алғанда маңызды әрі үйлесімді жұмысты талап етеді.
– Жолдаудың уақытылы және сапалы жүзеге асырылуы ғана азаматтардың өмір сүру деңгейін арттырып, экономиканың құрылымдық жаңғыруын қамтамасыз етеді. Жолдауда қойылған міндеттер белгіленген мерзімде мүлтіксіз орындалуы тиіс. Үкімет жалпыұлттық іс-қимыл жоспарын әзірлеу жөніндегі жұмысты бастағаны дұрыс болды. Арқаны кеңге салатын уақыт жоқ. Барлық министрлік пен ведомствоның, әкімдіктің басшылары реформаларды тиімді және уақтылы жүзеге асыруға өздері жауапты болады, – деді Қасым-Жомарт Тоқаев.
Сондай-ақ, Қазақстан Президенті Қасым-Жомарт Тоқаев он мемлекеттің елшілерінен сенім грамоталарын қабылдады.
Мемлекет басшысы Қазақстан Республикасындағы Төтенше және өкілетті елші міндетін қоса атқаратын бірқатар мемлекеттің дипломатиялық өкілдерінен сенім грамоталарын қабылдады. Салтанатты рәсім дәстүр бойынша «Ақорда» резиденциясында өтті.