Тамыздың соңғы күні Жамбыл ауданында жылына 8 мың тонна ет өндіретін «Империя Фуд» ет өңдеу кешені ашылды. Отандық өнімді сырт елдерге шығаруға, экспортқа бағытталған заманауи кәсіпорынның іске қосылуының арқасында өркенді өңірге 2,9 млрд инвестиция тартылып, 80 адам жұмыспен қамтылды.
Төрт түлік өсіру жөнінен басқа аймақтардың алдында тұратын Жетісу өңірінде жұмысқа кіріскен ет комбинатының салтанатты ашылуына Ауыл шаруашылығы министрі Сапархан Омаров, Алматы облысының әкімі Амандық Баталов, Иран Ислам Республикасының Қазақстандағы Төтенше және өкілетті елшісі Маджид Самадзаде Сабер және өзге де ресми өкілдер мен мүдделі адамдар қатысты.
Жаңа кәсіпорын жылына 8 мың тонна ет өнімін шығаруға қуатты, 12 мың қалбырға арналған консервілік желісі, 14 тонналық қан және сүйек ұнын шығаратын зауыты бар. Ет комбинаты жобасын жүзеге асыруға 2,9 млрд теңге инвестиция тартылған.
«Республикада ауыл шаруашылығындағы жалпы өнімің 20 пайызын Алматы облысы өндіреді. Өңірде 1 миллионнан астам ірі қара және 4 миллионнан астам қой-ешкі бар. Сондықтан заманауи технологияларды қолдана отырып, етті тереңдете өңдеу арқылы экспортқа бағытталған өнім өндіруді басты бағыттардың бірі ретінде қарастырып отырмыз. Соның нәтижелерінің бірі ретінде жаңа ет комбинатының іске қосылуын атап өтуге болады. Ауылды жерде ашылған кәсіпорын жаңа жұмыс орындарының ашылуына ықпал етті.
Тартылған инвестицияның өзін ақтары анық. «Қазақстанда жасалған» белгісімен сапалы өнім шығару – біз үшін зор табыс. Осының бәрі – дұрыс жүргізіліп отырған мемлекеттік саясаттың жемісі. Инвесторларға, осы жобаны іске асыруға атсалысқан барлығыңызға алғыс айтамын, – деді өзінің құттықтау сөзінде Алматы облысының басшысы Амандық Баталов.
Ауыл шаруашылығы министрі С.Омаров «100 нақты қадам» Ұлт жоспарында ет өңдеу саласына инвестиция тарту туралы жан-жақты айтылғанын айтып, сол тапсырманың орындалуының нақты нәтижесін көріп отырғандығымызға тоқталды. Алматы облысында ауыл шаруашылығы барлық бағытта қарқынды дамып отырғанын, қант қызылшасының алқабы ұлғайтылып, бұрын тоқтап қалған қант зауыттары қайта іске қосылып жатқанын, бақ өсіру өркендей бастағанын да айта кетті. Сөзінің соңында ендігі мақсат қайта өңдеу саласын жандандыру екенін де еске салды.
Ауыл шаруашылығы министрі С.Омаров «100 нақты қадам» Ұлт жоспарында ет өңдеу саласына инвестиция тарту туралы жан-жақты айтылғанын айтып, сол тапсырманың орындалуының нақты нәтижесін көріп отырғандығымызға тоқталды. Алматы облысында ауыл шаруашылығы барлық бағытта қарқынды дамып отырғанын, қант қызылшасының алқабы ұлғайтылып, бұрын тоқтап қалған қант зауыттары қайта іске қосылып жатқанын, бақ өсіру өркендей бастағанын да айта кетті. Сөзінің соңында ендігі мақсат қайта өңдеу саласын жандандыру екенін де еске салды.
Иран Ислам Республикасының Қазақстандағы Төтенше және өкілетті елшісі Маджид Самадзаде Сабер де сөз алып, екі ел арасындағы іскерлік байланыс, өзара ынтымақтастық бұдан ары жалғаса беретініне сенім білдірді.
Инвестор «Империя Фуд» ЖШС директоры Джавидан Арман Джавад өндірісті іске қосудың барлық кезеңінде мемлекет тарапынан көрсетілген қолдауларға, сол сияқты жергілікті бюджет есебінен жүргізілген инфрақұрылыммен қамтамасыз ету жұмыстары үшін облыс басшылығына ризашылығын жеткізді. Кәсіпорын басшысының айтуынша, мұнда жыл басынан бері 332 тонна ет өндіріліпті. Оның ішінде 73 тонна ет Иран мен Бахрейнге экспортталған. Жыл соңына дейін тағы 640 тонна өнімді сырт елдерге жөнелту жоспарланып отыр.
Биыл Алматы облысындағы қолайлы инвестициялық климаттың арқасында жалпы инвестиция көлемі 1 трлн теңге болатын 38 жоба жүзеге асырылуда.
