Орталық коммуникациялар қызметі алаңында Президенттің кеңесшісі Ерлан Қариннің қатысуымен брифинг өтті. Кеңесші Ұлттық қоғамдық сенім кеңесі жұмысы туралы мәлімдеме жасады. Кеңесте қоғам белсенділері тарапынан айтылған ұсыныстар құжат түрінде жинақталатынын айтты.
Ұлттық қоғамдық сенім кеңесіне Президент Қасым-Жомарт Тоқаев пен 40-тан астам қоғам белсендісі қатысты. Осыған дейін, 27 тамыз күні кеңестің дайындық отырысы өтті. Онда саяси, әлеуметтік және экономикалық жаңғырту мәселесі бойынша 3 жұмыс тобын құру туралы шешім шықты. Брифингте Ерлан Қарин Ұлттық қоғамдық сенім кеңесінің құрылымын атады.
– Ұлттық кеңестің алғашқы ресми отырысы өтті. Ең алдымен, Ұлттық кеңес өткізу жайын Қасым-Жомарт Кемелұлы мамыр айындағы сайлауалды бағдарламасында айтты. Кеңес билік пен қоғамның саяси диалог алаңына айналу керегін айтқан еді. 12 маусымда Ұлттық кеңес құруға Жарлық берді. Жарлық бойынша 1 ай ішінде Президент Әкімшілігіне Азаматтық қоғам өкілдерімен, саяси партиялардың және қоғамдық ұйым өкілдерімен консультация өткізу бойынша тапсырма берді. Тапсырмаға сәйкес, 1 ай бойы, маусым-шілде айында тиісті ақыл-кеңес кездесулері өткізіліп, соның негізінде Ұлттық кеңестің алғашқы құрамы анықталды, – деді ол.
Ерлан Қариннің айтуынша, үш топ өзара келісіп, көтеретін мәселені анықтайды. Әр топтан 2 спикер шығып, атқарылған жұмыс нәтижесін жариялайды. Үш топ әр ұсыныс бойынша түрлі талқылау ұйымдастырады. Осыған сай ұсыныстың орындалу барысын бақылайды.
Ұлттық кеңестің берері мол. Өйткені кеңес әр сала бойынша ашық пікірталас алаңына айналды. Қоғам белсенділері ұсыныс білдіріп, мәселелер қаралатыны айтылды.
«Бүгін көтерілген ұсыныстар қоғам дамуының барлық саласын қамтиды. Саяси, экономикалық даму бағыты бойынша өзекті мәселелер талқыланды. Әртүрлі пікір айтылды. Меніңше, кеңес бүгін ашық пікірталас алаңы ретінде өзін анық көрсете білді. Бүгінгі жиын барысында кеңес мүшелері ең маңызды мәселелер бойынша пікірлерімен бөлісті», – деді Ұлттық қоғамдық сенім кеңесінің хатшысы.