Ақжайық ауданының орталығы Чапаев ауылының тұсында Жайық өзенінен өтетін қалқымалы көпір пайдалануға берілді. Бұл нысанның ашылу рәсіміне Батыс Қазақстан облысының әкімі Ғали Есқалиев қатысып, аудан тұрғындарының қуанышына ортақтасты.
Шынтуайтына келгенде, бұл – тек Ақжайық ауданының ғана емес, көршілес Теректі ауданының біраз елдімекеніне де ортақ қуаныш. Президент Қасым-Жомарт Тоқаев халықтың мұң-мұқтажына, орынды талап-тілегіне сергек қарауды биліктің барша буынынан талап етуде. Осыған орай аудан орталығындағы көпірдің құрылысына облыстық бюджеттен 175 млн теңге қаржы бөлінді.
– Өздеріңізге белгілі, Ақжайық ауданында Жайық өзенінің екі жағын жағалай қоныстанған 52 елдімекен бар. Жайықтың сол жағында ауданның 10 мыңға жуық тұрғыны мекендейтін 19 ауыл орналасқан. Жайықтың Бұқар бетіндегі ауылдардың тұрғындары аудан орталығына қатынау үшін күні бүгінге дейін біраз әбігерге түсіп келгені шүбәсіз. Олар Чапаев ауылына жету үшін Орал қаласы арқылы немесе көршілес Атырау облысының Индер ауданы орталығының тұсындағы көпірден өтіп келуге мәжбүр болды. Мысалы, Көнеккеткен, Құрайлысай, Сайқұдық тұрғындары аудан орталығына жету үшін осы күнге дейін 250 шақырым жол жүрсе, енді олар небары 25-50 шақырым жол жүретін болады. Бұл жол қатынасы 5-10 есе қысқарып, қарапайым халықтың уақыты үнемделеді деген сөз. Ең бастысы, Жайықтың екі жағында тұратын ағайындарымыз бір-бірін жиі көруге мүмкіндік алды, – деді облыс әкімі.
Ғали Нәжімеденұлының сөзіне қарағанда, көпірді өзіміздің отандық өнім деуге негіз бар. Өйткені көпірдің 80%-ы қазақстандық материалдан жасалған. Сонымен қатар өңір басшысы тоғыз жолдың торабында орналасқан Чапаев ауылы тұсынан керілген қалқымалы көпір ауданның дамуына, ауыл тұрғындарының тұрмыс сапасының артуына оң ықпал ететінін атап өтті. Әрине, жаңа көпір жолаушы мен жүк тасымалын арттырып, шағын және орта бизнестің өркендеуіне жаңа серпін бермек. Себебі, онымен тек Ақжайық ауданы тұрғындары ғана емес, сондай-ақ көршілес аудан тұрғындары да қатынайтын болады.
Шара барысында өңір басшысы көпірді құрастырған Орал кеме жасау және кеме жөндеу мекемесіне, жобаны жүзеге асыруға атсалысқан барлық мамандарға ризашылығын білдіріп, «Жаңа көпір ел игілігіне, облыстың қажетіне қызмет ете берсін!» деген тілегін алға тартты.
Мердігер мекеменің, яғни Орал кеме жасау және кеме жөндеу зауытының директоры Владимир Самсонов ұзындығы – 126 метр, ені – 6 метр болатын көпір 3 бөліктен тұратынын және оның бірі ажырамалы екенін айтып өтті. Көпірдің жүк көтерімділігі – 60 тонна. Құрылыс жұмыстары 6 ай ішінде аяқ-талды.
Бауыржан ҒҰБАЙДУЛЛИН,
Батыс Қазақстан облысы