Мұхтар Әуезов атындағы Қазақ мемлекеттік академиялық драма театрында қазақтың көрнекті ақыны Фариза Оңғарсынованың 80 жылдығына орай «Фариза» спектаклінің премьерасы қойылды. Идея авторы әрі продюсері – Айнұр Көпбасарова.
Бір қызығы, осыдан біраз уақыт бұрын Фариза ақын продюсердің түсіне кіреді. Ол түсінде продюсерді сахнаға алып шығады. Қасында Мұқағали Мақатаев болады. Айнұр «Бұл түс маған бекер кірген жоқ, ақын жайлы спектакль қою керек» деп ой түйеді. Содан осы мақсатта жұмыс істей бастайды. Шығармашылық топтың бұл спектакльді қоюдағы мақса-
ты – елімізге танымал тұлғаның өміріне, жан дүниесіне терең бойлап, оны үлгі-өнеге тұту, көпшілікке ой тастау.
Фариза – сыршыл жырларымен, мінезінің күрделігімен, шыншылдығымен көпшіліктің жадында қалған дара тұлға. Оның образын ашу, болмысын көрсету оңай емес. Орталық ақынның өмірі туралы пьесаны жазуға Роза Мұқанованы таңдады.
– Егер бас продюсер және идея авторы Айнұр Көпбасарова болмаса, бұл шығарма жазылмаған болар еді. Бұл шығарма бәлкім жазылар, бірақ Айнұр болмаса, сахнада қойылмас еді. Осы киелі сахнаға «Мәңгілік бала бейнеден» кейін араға 22 жыл салып шығып тұрмын, – деді драматург Роза Мұқанова. – Фариза – дара. Мұқағали қазақ поэзиясында қандай алып тұлға болса, Фариза – соның егізі. Ақын туралы әлі талай дүние келер, оған талай шығарма арналар. Қазір осындай үлкен еңбекті ел алдына шығарған продюсерлік компанияны атап өтпеуге болмайды. Өйткені өнер өте нәзік. Фариза апам айтқандай, қаражаты болмаса, байлығы болмаса, өнер үлкен сахнада көрініс таба алмайды. Сол нәзік өнерді жапа шектірмей, аяқкиімін ақжем қылып тоздырмай, қолыма қалам ұстатып, «Роза апа, Фаризаның жақсы көрген сіңлісі едіңіз, үлкен де болса сізбен дос болған еді. Сіз Фариза апаға арнап шығарма жазбауыңыз мүмкін емес» деп ұсыныс жасаған өнерсүйер бауырларыма басымды иіп, рақмет айтқым келеді.
Спектакльдің режиссері – Фархат Молдағали. Басты рөлді сомдау «Дарын» мемлекеттік сыйлығының лауреаты Назгүл Қарабалинаға бұйырды. Сондай-ақ театр және кино актерлері Қуандық Қыстықбаев, Лейла Бекназар-Ханинга мен Ерлан Кәрібаев та спектакльдің көрерменнің көңілінен шығуына барынша атсалысты.
– «Фариза» спектаклі – өте қымбат ақшаға қойылған жоба. Егер осы шығынды көтере алатындай тапсырыс болса, спектакльді қойып береміз. Бұрын-соңды мұндай жоба болмаған. Бұл спектакль – біздің кім екенімізді танытатын үлкен жоба. Сондықтан оған жұмсалған қаражат өзін-өзі ақтайды дей аламын, – дейді спектакльдің әдеби редакторы Шынар Омарова.
Спектакльді алдағы уақытта Мәскеу мен Нұр-Сұлтанда сахналау жоспарланып отыр.