Жаңа Арбат та, жаңа алаң да жоқ
Осыдан біраз күн бұрын кейбір республикалық ақпарат көздерінде Нұр-Сұлтан қаласы, Қарағанды, Ақмола, Қызылорда облыстары Семейге көмек көрсетуден бас тартқаны туралы ақпарат тарады. Неліктен өңірлер жыл басында берген уәделерінен тайқып кетті? Алдын ала дайындалған жоспар бойынша ұлы Абайдың 175 жылдығына орай Семейдің шаһар шаруашылығында үлкен өзгерістер орын алып, қала көз тартарлықтай көріктенуі керек болған. Жаңа Арбат, жаяу жүргіншілер аймағы салынып, Абай мен Мұхтар Әуезов алаңдары және Орталық саябақ жөндеуден өтуі тиіс болған. Жоспарға сай нысандардың бәрі тамыз айында қолданысқа беріліп, қала тұрғындарын қуантуы керек еді. Аталған нысандарды өз кезегінде еліміздің қалалары мен облыстары жөндеп беруге уәде еткен. Өкінішке қарай, бірқатар облыс пен бас қаламыз жауапты кезеңде бұл шаруадан бас тартқаны белгілі болды. Бұл туралы таяуда «Еуразия» бірінші арнасының тілшілері хабарлады.Астаналықтар ресми түрде бас тартты
Естеріңізде болса, жылдың басында шенеуніктер Семейдің күзге қарай адам танымастай ажарланатынын, бұл ретте бұған дейін астанамыздың 20 жылдық мерейтойында сыйлық ретінде бір-бір нысан соғып берген өңірлердің тәжірибесі тағы бір рет қолданылатыны айтылған болатын. Берілген уәде іске асатын болса, ендігі қарт Семейдің гүлденіп кетері рас еді. Бірақ бұған елдегі карантин қолбайлау болғандай. Осы жағдайды алға тартқан бірнеше облыстың басшылары Абай тойына сыйлық жасаудан айнып қалған екен. Мәселен, жыл басында Нұр-Сұлтан қаласы әкімдігі жалпы сомасы 418 миллион теңге қаражатқа Ертіс жағалауын қайта жөндеуді мойнына алған екен. Айтуларынша, берілген уәдеден бас тартуға елдегі карантин басты себеп болыпты. Осылайша, Абай тойында қасиетті қарт Семейге «сыйлық» жасаушы облыстар санының қысқарып отырған жайы бар. Назарларыңызға Нұр-Сұлтан қаласы әкімдігінің семейлік әріптестеріне жіберген ресми бас тарту жауабынан үзінді келтірейік. «Қалалық әкімдік Абай Құнанбайұлының 175 жылдық мерейтойына арналған түрлі іс-шараларды өткізудің маңызын түсінеді әрі қолдайды. Алайда қалыптасқан экономикалық қиындықтарға және бюджеттің шектеулілігіне байланысты жоғары аталған жобаны жүзеге асыруға қаржы қарастырылмаған», – делінген астанадан келген ресми жауапта. Астаналықтардың артынан ақылдасып алғандай, құрылыс жұмыстарынан Қарағанды, Ақмола, Қызылорда облыстары да бас тартқан. Ал жобаларын іске асырамын деп Семейде қалғандардың нысандарын қолданысқа беру мерзімін кешіктіріп жатқаны БАҚ бетінде сынға ілінуде. Айталық, Мұхтар Әуезов атындағы алаңды Батыс Қазақстан облысы қайта жөндеуден өткізуі тиіс болған. Тіпті, әлеуметтік желіде демалыс аймағының болашақтағы көрінісінің макеті де жарияланыпты. Өкініштісі, ескерткіш маңы қазір шын мәнінде олай емес. Ол аздай заңғар жазушының ескерткішінің тұғыры құлай бастағаны да көңіл құлазытады. Ал қалалық әкімдіктегілердің айтуынша, әлеуметтік желідегі жоба эскизі әу баста көңілден шықпаған әрі бұл жергілікті сәулетшілердің ұсынысы ғана болған. Сондықтан оны әлі ешкім мақұлдамаған.
Алматы облысының ғана аты озып тұр
Әзірге уәдесінен таймаған жалғыз өңір – Алматы облысы. Алматы облысы Семейдегі Әуезов пен Селевин көшелерінің қиылысынан ет комбинатына дейінгі аумақта «Абай жолы» жаяу жүргіншілер аймағын салуды өз мойындарына алған. Семей ақпараттық орталығы таратқан мәліметтерге сүйенсек, Алматы облысы қазіргі таңда жұмыстың 80 пайызын аяқтаған. Жоспарға сәйкес нысанды тапсыру қыркүйек айына жоспарланған. – Алматы облысы жұмыстардан бас тартқан жоқ және барлығын мерзімінде орындайды. Біз «Абай жолы» нысанын тоқтаусыз салып жатырмыз. Жақында біз туралы баспасөз беттерінде «құрылысты кешіктіріп жатыр, олар шілде айының ортасында тапсыруы керек болған» деген ақпарат тарады. Шындығында олай емес, құжат бойынша жұмыстар 18 қыркүйекте аяқталады. Біз жұмысты мамырдың соңында бастадық және қазір негізгі бөлігін бітірдік. Белгіленген уақытқа дейін бәрі дайын болады, үлгереміз, – дейді жұмыс өндірісінің жетекшісі Рафаил Хазипов. Оның айтуынша, жоба құны 600 миллион теңгеден асатын «Абай жолы» жобасы ұзындығы 2 100 метр болатын жаяу жүргіншілер көшесі мен ұзындығы 1 600 метрлік веложолдан тұрады. Бүкіл жол бойына орындықтар қойылып, сегіз балалар алаңы, спорттық алаң салынады және жарықтандыру орнатылады. – Құрылыс материалдарының бәрі жергілікті. Төсеуіш тастар, шамдар, орындықтар мен қоқыс жәшіктері бәрі жергілікті өндірушілерден. Жиектастарды Текеліден жеткіздік, ойын алаңдары Алматыдан келді. Веложолды «Гордорстрой» кәсіпорны дайындады. Мұнда күзде мыңға жуық ағаш отырғызу жоспарланған. Сонымен қатар көше бойына Абайдың сөздері жазылған жеті стелла орнатылады. Бұл қалаға біздің тарапымыздан үлкен сыйлық болмақ, – деді Рафайл Хазипов.Семейліктер саябақтың ашылуын күтіп жүр
Семейдегі құрылысы тым созылып кеткен нысанның тағы бірі – қаладағы Орталық саябақ. Мұндағы жұмыстар екі жылдан бері жүруде. Биыл да қолданысқа берілуі екіталай. Мұны қалалықтардың алаңдауынан байқауға болады. Тұрғындардың бірі «Саябақтың қашан ашылатыны әлі белгісіз. Сондықтан қала, облыс билігі балалар саябағына назар аударса дейміз» десе, енді бір тұрғын «Қалада баратын дұрыс демалыс орны жоқ, ал саябақ құрылысы жыл да созылып келеді. Бітетін уақыты болды ғой, тезірек ашылса екен» дейді. Жоба құжаттары бойынша Орталық саябақты қайта құру жұмыстары өткен жылы аяқталуы керек болған. Бірақ жұмыстар жобаны мемлекеттік сараптамадан өткізуге байланысты тоқтап қалған. Қазір қайта жұмыс басталған. Шенеуніктер нысан алдағы қыркүйекте іске қосылатынын айтады. – 30 маусымда саябақты тапсыруымыз керек болған. Карантин шараларына байланысты кешігу орын алды. Бұл форс-мажор. Қазір жұмыс қызды, адамдар мен техника саны артты. Қазіргі уақытта құрылысшылар тротуар плиткаларын жылдамдатып төсеп жатыр, – дейді Семей қалалық ТҮКШ және тұрғын үй инспекциясы бөлімі абаттандыру секторының меңгерушісі Асан Дүйсембаев P.S.Міне, Семейге өзге облыстар сыйға тартпақ болған нысандардың дәл қазіргі күйі осындай. Айтпақшы, Семейде Өскемендегідей Арбат салу да жоспарланған болатын. Жергілікті билік, тіпті оған «Еуропаның бөлшегі» деген тамаша атау да беріп қойған. Өкінішке қарай, сөз бен істің арасы тағы да алшақ кетіп, семейліктер шілде айына уәде етілген Арбатты сол күйі көрген де жоқ. Әзірге Семей тұрғындарына қыркүйек айында қолданысқа берілетін «Абай жолымен» жүру бақыты ғана бұйырып тұр.
Дәурен АЛЛАБЕРГЕНҰЛЫ, Шығыс Қазақстан облысы