Қазақстан Президенті Қасым-Жомарт Тоқаев 11-12 қыркүйек күндеріне жоспарланған Қытай Халық Республикасына мемлекеттік сапары қарсаңында Қытайдың CCTV телеарнасына сұхбат берді. Бұл туралы ел Президентінің баспасөз хатшысы Берік Уәли Facebook-тегі парақшасында хабарлады.
Мемлекет басшысы қазақ-қытай қатынастарының даму перспективаларына қатысты ой-пікірімен бөлісті. Күн тәртібінде тұрған екі ел арасындағы мәселелерден бөлек, шығыс көршінің журналистерін Қасым-Жомарт Тоқаевтың қазіргі халықаралық қатынастардағы Қытайдың рөліне, ҚХР-дың 70 жылдық мерейтойы қарсаңындағы жетістіктеріне берген бағасы қатты қызықтырды. Сондай-ақ ел Президенті жеке басына қатысты бірқатар сауалдарға жауап берді.
Сұхбат CCTV телеарнасының эфирінен көрсетіледі.
Ал Президент көмекшісі Мұрат Нұртілеуов Қасым-Жомарт Кемелұлының Қытайға алдағы мемлекеттік сапарының егжей-тегжейі, бағдарламасы және келіссөздерден нендей нәтижелер күтілетіні жайында айтып берді.
– Біз Президент Қ.Тоқаевтың ҚХР-ға бірінші мемлекеттік сапарын мазмұнды әрі сапалы дайындауға үлкен мән берудеміз. Қытай төрағасы Си Цзиньпиннің шақыруына орай жасалғалы отырған бұл сапардың ҚХР-дың құрылуының 70 жылдығы қарсаңында өтуінің символдық маңызы бар. Қазір қазақ-қытай екіжақты стратегиялық серіктестігін ары қарай нығайтудың жаңа жолдарын іздеу қажет, аталған сапардың өзектілігі де осында. Мемлекеттік сапардың бағдарламасы өте мазмұнды, кестесі тығыз. ҚХР төрағасы Си Цзиньпинмен келіссөздері жоспарланған. Оның қорытындысы бойынша мемлекеттер басшылары жаңа кезеңде жан-жақты стратегиялық серіктестікті дамыту туралы бірлескен мәлімдемеге қол қояды деп жоспарланған, – деді Мұрат Нұртілеуов «Қазинформ» ақпарат агенттігіне берген сұхбатында.
Осының өзі көрші жатқан қос мемлекеттің екіжақты күн тәртібі және басымдықтары өзектілендірілетінін білдіреді.
Бұдан бөлек, Қасым-Жомарт Кемелұлы Қытай мемлекеттік кеңесінің премьері Ли Кэцянмен кездеседі деп күтілуде. Сондай-ақ Қазақстан Президенті Бүкілқытайлық халық өкілдері жиналысының тұрақты комитетінің төрағасы Ли Чжаньшумен жүздеспек.
Мемлекет басшысы сонымен қатар қазақстандық-қытайлық іскерлік кеңесінің алтыншы отырысына қатысуды жоспарлап отыр.
Мұның сыртында шың еліне сапар бағдарламасына қытай тіліне жүйрік Қ.Тоқаевтың Қытай қоғамдық ғылымдар академиясында баяндама жасауы да кіріпті.
Ел Президентінің жұмыс кестесіндегі маңызды бір шара Чжэцзян провинциясындағы Ханчжоу қаласында ұйымдастырылуда. Атап айтқанда, онда Қасым-Жомарт Тоқаевтың аты әлемге танымал кәсіпкер, Alibaba Group компаниясының негізін қалаушы Джек Мамен кездесуі, Hikvision компаниясын аралауы жоспарланған.
Бұған қоса, сапар аясында үлкен деректерді өңдеу үшін қазақстандық тарапқа суперкомпьютер беру туралы келісімге қол қойылатын болады. Бұдан өзге, келіссөздер нәтижесінде, әртүрлі салада оншақты құжат рәсімделеді деп күтілуде.
