Жыл сайынғы Мемлекет басшысының Жолдауы елдің әлеуметтік-экономикалық әлеуетін одан ары жақсартуға бағытталған басты құжат болып есептеледі. Осы жолғы Президент Қасым-Жомарт Тоқаевтың алғашқы Жолдауы да дәстүрді үзбеді. «Сыңдарлы қоғамдық диалог – Қазақстанның тұрақтылығы мен өркендеуінің негізі» атты Жолдауда әлеуметтік салаға зор назар аударған. Соның бірі – білім саласы. Қоғамда адам капиталы маңызды фактор десек, оны дамытуға үлес қосатын саланың бірі – білім. Ал сапалы білім – табыс кепілі. Міне, еліміздегі білім, оның орны, дамуы секілді мәселелерді Шиелі индустриалық-аграрлық колледж директоры Мейрамхан Дүйсеновпен аз-кем әңгімелесудің орайы келді.
– Мейрамхан Мұсаханұлы, Тамыз кеңесінде Мемлекет басшысы Қасым-Жомарт Тоқаев арнаулы оқу орындарын жаңартуда – уақыт талабы мен еңбек нарығының қажетіне қарай жүргізу керегін, сондай-ақ дуалды оқытуды дамытумен стратегиялық бағдарламаларды іске асыруды тапсырды. Осы міндеттерді орындауда колледжде қандай жұмыстар жүргізіліп жатыр?
– Рас, Мемлекет басшысы Қасым-Жомарт Тоқаев Тамыз кеңесінде бұл тапсырмаларды міндеттеді. Сонымен бірге Президент еліміздегі еңбек ресурстарының балансын есепке алудың тиімді әдістемесін әзірлеуді, маман даярлаудың отандық жүйесін нақты еңбек нарығында қалыптастыруды, оқушылардың қабілетін айқындап, кәсіби бағыт-бағдар беруді, қала мен ауыл мектептері арасындағы орта білімнің алшақтығын болдырмауды, сапалы оқулықтармен қамтамасыз ету керегіне баса назар аударған. Бұл міндеттерді орындау жолында біз бар күш-жігерімізді жұмсаудамыз.
Біздегі білім беру сапасын жақсарту, жастарды ұлттық рухта тәрбиелеу мәселесіне жан-жақты атсалысудамыз. Білім сапасын қамтамасыздандыру бойынша тәуелсіз агенттігінің рейтингі жасалып отырады. Биыл біздің оқу орны Қазақстандағы агротехникалық колледждер рейтингінде 3-орында тұр. Оның өзі үлкен жетістік. Сонымен қатар оқытылатын 8 мамандық бойынша аккредиттеуден өтіп, мекеме мен өндіріс, өндіріс пен теорияның біте қайнасқанын, білімнің қара шаңырағына айналғанын дәлелдедік. Қазір колледжіміз еңбек нарығында бәсекеге қабілетті жас мамандар даярлауда. Оған қоса, аграрлы-индустриалды саланы дамытуға үлес қосудамыз.
– «Рухани жаңғыру» бағдарламасын ілгерілету бойынша колледжде қандай жұмыстар жүргізіліп жатыр?
– Елбасы Нұрсұлтан Назарбаевтың «Болашаққа бағдар: рухани жаңғыру» мақаласы аясында «Руханият» тарихи өлкетану кабинетін аштық. Ол жерде жергілікті өңірдегі қасиетті орындарды, ел ішінде танымал адамдарды, ел арасында есімі ұмыт қалған тұлғаларды, қолөнер бұйымдарын, ескерткіштерді жинақтап, толық мағлұматын жазып қойдық. Мұндағы мақсатымыз – өскелең ұрпаққа ұмыт болған дүниелерді қайта жаңғыртып, халқымыздың өткен тарихынан бергі өмір дағдысы мен қалыптасуына тереңінен бойлату. Оған қоса, кітап – рухани азық. Сондықтан сөрелердің біреуінде Елбасымыз Н.Назарбаевтың кітаптары, Қазақстан халқына жолдаған Жолдаулары мен мақалалары жинақталса, келесіде – Қызылорда облысы бойынша ғасыр адамы атанып, ел алдында абыройлы болған азаматтардың жетістіктері туралы және Шиелі ауданынан шыққан ақын-жазушылардың кітаптары мен шығармалары қойылған.
«Рухани жаңғыру» бағдарламасын ілгерілету бойынша колледжде атқарылатын жұмыстардың іс-жоспары жасалып бекітілген. Жоспарға сәйкес, Елбасымыздың «Ұлы даланың жеті қыры» мақаласының «Тарихи сананы жаңғырту», «Ұлы даланың ұлы есімдері», «Түркі әлемінің генезисі» жайлы айтылған. Соған орай, колледж оқушылары еліміздегі тарихи жерлер туралы тереңірек танысу үшін Түркістан облысындағы орналасқан Қожа Ахмет Ясауи кесенесі мен аты аңызға айналған Үкаша ата кесенесіне барып қайтты.
Елбасымыздың «Ұлы даланың жеті қыры» мақаласының «Тарихи сананы жаңғырту», «Ұлы даланың ұлы есімдері», «Түркі әлемінің генезисі» жайлы айтылған. Соған орай, колледж оқушылары еліміздегі тарихи жерлер туралы тереңірек танысу үшін Түркістан облысындағы орналасқан Қожа Ахмет Ясауи кесенесі мен аты аңызға айналған Үкаша ата кесенесіне барып қайтты.
Мәселен, №9 «Ауылшаруашылық өндірісіндегі тракторист-машинист» оқу тобының білім алушыларымен Еңбекші елдімекенінде орналасқан Егеулі әулие басына зиярат етуге бардық. Ауыл тұрғыны Берікқара ақсақалдың айтуынша, Егеулі деген шаруа адамы болған. Ол кісінің еккен дәнді дақылдарының өнімі көл-көсір болыпты. Күндердің бір күнінде оның егіс алқабына қалмақтар шауып, піскен қауын, қарбызын тойғанынша жеп, қалғанын ат аяғымен таптап, жарамсыз қылып кеткен. Бұл жағдай бірнеше рет қайталанған. Сонда шаруа ызаланып, «қауын-қарбыздарымды жау жегенше, тасқа айналсын» деп тасқа айналдырып жібереді. Жау қайта келгенде жемістердің тасқа айналғанын көріп, шаруаның кепесіне баса көктеп кіріп, өлтіріп салады. Сол кезде жерге төгілген қан судай аққан деседі. Міне, сол жер «Егеулі әулие» жері болып аталып кеткен екен. Егеулі әулие басында құдық бар. Содан су ішіп, тілек, дұға қылып, дертке шипа іздеп баратындар көп.
– «Жақсының жақсылығын айт, нұры тасысын» дегендей, ел үшін еңбек етіп, тағдырын халқымен байланыстыратын жандар баршылық. Сондай адам – өскелең ұрпаққа үлгі. Аудандағы осындай азаматтарды атай аласыз ба?
– Оқу орнымыздың материалдық-техникалық базасын нығайтып, оқып жатқан оқушыларға әртүрлі көмек жасап жүретін жандар жоқ емес, бар. Соның бірі және бірегейі – Махмұд Нәлібаев. 60-70 жылдары Махмұдтың әкесі Ыбырай осы оқу орнын басқарған еді. Әкесінің бастаған жолын үзбей, жалғап жатыр. «Марсель-GRОUP» ЖШС компаниясының бас директоры, өте жанашыр жан. 2008-2012 жыл аралығында Оңтүстік Қазақстан мен Қызылорда облыстарының денсаулық сақтау саласына, спортқа, жол құрылысына, әлеуметтік нашар қамтамасыз етілген отбасыларға, балалар үйіне, соғыс ардагерлеріне, тарихи орындарды абаттандыруға облыс әкімдіктерімен келісе отырып, 347 000 млн теңге қаржылай қолдау көрсетілген.
Соның ішінде біздің колледжге 2011 жылы Ыбырайхан Нәлібаев атындағы жүлде тағайындап, 10 команда арасында спорттың үш түрінен жарыс өтіп, жеңімпаздарға бағалы сыйлықтар табысталды. Кәсіпкерлікпен қоса, ол – қоғамдық салада Кеңес Одағының Батыры, Халық Қаһарманы, ұлт мақтанышы, еліміздің тұңғыш Қорғаныс министрі Сағадат Нұрмағамбетов атындағы Халықаралық қайырымдылық қоғамдық қорының төрағасы. Осы мақсатта Елбасының 2050 бағдарламасы аясында өткенді жаңғыртып, ұлт мақтанышына айналған тарихи тұлғаларды жас ұрпаққа насихаттау жұмысын жүргізуде. Мысалы, Шиелі өңірінде дүниеге келген сегіз қырлы, бір сырлы тұлғалар М.Шоқай, Б.Қабылұлы, Н.Бекежанов, Ы.Жақаев, Ш.Есенов, Қ.Қалменов, Ш.Бәкіров, Ы.Нәлібаев сынды тұлғалардың еңбектерін жас ұрпақтарға дәріптеп, әкелер сабақтастығын жалғастыру мақсатында патриоттық іс-шара өткізілді. Сол кездегі асыра сілтеу саясаты зардабынан мыңдаған жазықсыз адамның қаны мен көз жасына толған күндер тарих сахнасында үлкен мұңмен жазылып қалды. Аудан жұртшылығы репрессия құрбандарын еске алу мақсатында М.Шоқай алаңына жиналып, жазықсыз жапа шеккен азаматтардың құрметіне ескерткіш алдына гүл қойып, құран бағыштап, дұға оқыды. Тіпті, қор атынан колледж оқушыларына шәкіртақы тағайындалған да болатын. Осындай азаматқа айтар алғысымыз шексіз.
– Бүгінде оқу орынның жеткен жетістігі мен оң нәтижелері қандай?
– Құдайға шүкір, осы күнге дейін жеткен жетістіктеріміз ұлан-асыр. Бәрін тізбектеп айтсаң, уақыт та жетпейді. Дегенмен былтыр оқушыларымызбен бірге мұғалімдердің де алған марапаты жетерлік. Мәселен, «Өрлеу» біліктілікті арттыру ұлттық орталығы Қызылорда облысы бойынша педагогикалық қызметкерлердің біліктілігін арттыру институтының «Білім беру ұйымдарындағы роботты техника» тақырыбындағы облыстық көрмеге қатысқан жалпы пән оқытушысы Жанар Байдраманова және білім алушысы Ораз Асанбайұлы сертификатқа ие болды. Сонымен қатар былтыр мамыр айында Қызылорда «Болашақ» университеті колледжінің ғылыми-конференция залында «Қызмет көрсету, құқық және өнер мамандықтар пәндері» циклдік бірлестігінің оқытушыларының ұйымдастыруымен «Рухани жаңғыру: білім мен бірліктің дамуы» атты апталық аясында Кәсіптік және техникалық білім беретін оқу орындарының білім алушылары арасында Елбасының «Болашаққа бағдар: рухани жаңғыру» мақаласының «Туған жер» бағдарламасы аясында «Қызылорда облысының тарихи ескерткіштері» тақырыбындағы ғылыми-теориялық конференцияға қатысқаны үшін студент Гүлсезім Амал және жетекшісі Г.Жүнісбекова облыстық оқу орталығының сертификатын алды. Сол жылдың сәуір айында «Бөбек» Ұлттық ғылыми-практикалық, білім беру және сауықтыру орталығының ұйымдастыруымен өткен «Өзін-өзі тану» рухани-адамгершілік білім беру бағдарламасын жүзеге асырудың жаңа бағыттары» тақырыбындағы әдістемелік семинарға қатысқаны үшін Бақтияр Дайрақұлов, өзін-өзі тану пәнінің оқытушысы Г.Досымова сертификат алған.
Әңгімелескен
Миуа БАЙНАЗАРОВА,
Қызылорда облысы