Тұрғындардың үздіксіз талабынан кейін қала әкімі Бақытжан Сағынтаев ықшамаудандағы барлық үйге тексеру жұмыстары жүргізілетінін айтқан болатын. Ол үшін Алматы қаласының Жайлы қалалық орта басқармасы «Қазақ құрылыс және сәулет ғылыми-зерттеу және жобалау институты» АҚ-мен келісімшартқа отырған. Жұмыс осы жылдың соңында аяқталуы керек. Әзірге 6 үйге қатысты қорытынды шықты.
«Бүгінде 6 үйге қатысты (1/180, 1/160, 1/161, 1/165, 1/167, 1/168) сараптама қорытындысы шықты. «Қазақ құрылыс және сәулет ғылыми-зерттеу және жобалау институты» АҚ қорытындысына сәйкес, осы үйлердің іргетасын нығайту керек. Тұрғын үйлердің іргетасын нығайту жұмысы тұрғындарды көшірмей жүзеге асырылады. №1/160, 1/161 үйлерде іргетасын нығайту жұмысы жүргізіліп жатыр» делінген әкімдік таратқан хабарламада.
Байқағандарыңыздай, бұл жолы тұрғындар басқа жаққа көшірілмейді. Бұл қаншалықты қауіпті немесе қауіпсіз екенін арнайы мамандар саралап шықты деген сенімдеміз. Әрине, 6 бірдей тоғызқабатты үйдің тұрғындарын басқа жаққа орналастыру да оңай шаруа емес. Біздің қолымыздағы мәліметке қарағанда, ең бірінші дабыл қағып, тұрғындары пәтерлерге көшірілген 72 отбасының өзіне өткен жылдың желтоқсан айында 12,452 миллион теңге пәтер жалдау үшін төленген. Мұны айларға көбейтсек, сондай-ақ қисайып, жөнделуі тиіс деген басқа үйлердің тұрғындарын қоса есептесек, қыруар қаражат кететінін шамалап отырмыз.
Сонымен, Зерделідегі үйлердің жаппай қисаюына не себеп? Мамандардың айтуынша, оның бірнеше себебі бар. Оның арасында негізгілері: арық жүйесі және аумақты тік жоспарлау дұрыс емес, техногенді, еріген, жаңбырлы, канализациядағы сулар үйдің түбіне жинала берген, іргетастың астында құрылыс қоқысы қалып қойған, іргетас астындағы топырақ тірегі 1,5 метр болуы керек, алайда онда тек 1,01 метр, топырақты қайта себу дұрыс жүргізілмеген, тығыздамай себе салған. Құқық қорғау органдары үйдің неге қисайғанын әрі бұл іске жауаптыларды анықтап жатыр.
Зерделіде әуелі бір үй қисайды деп қорытынды жасалып, оған қалпына келтіру жұмыстары жасалғанын айттық. Ресми мәлімет бойынша, енді оның қатарына тағы 6 үй қосылды. Дегенмен аудан тұрғындарының айтуына қарағанда, бұл жерде кемі 20 үй осындай апатты жағдайда. Телеарналардың біріне шыққан олар мемлекет басшысы Қасым-Жомарт Тоқаевтан көмек сұраған. Сондықтан Зерделідегі қисайған үйлердің жайына біз әлі талай қайта оралатын тәріздіміз.
Гүлнар ЖҰМАБАЙҚЫЗЫ
