Қазақстанда алғаш рет қымыз пісу бойынша әлемдік рекорд орнатылды. Қарағанды облысы Жаңаарқа ауданының 90 жылдығы мен Сәкен Сейфуллиннің 125 жылдығы мерекесі аясында жүзеге асты. «Рухани жаңғыру» бағдарламасы шеңберінде мерейтой үлкен ауқымда атап өтілді.
Мерекелік іс-шаралар Сәкен Сейфуллин ескерткішіне гүл шоғын қойып, «Сәкен туған Жаңаарқа» атты театрландырылған қойылымнан басталды. Шараға Сәкен Сейфуллиннің ұрпақтары, белгілі ақындар Ғалым Жайлыбай мен Серік Ақсұңқарұлы, Шет ауданы мен Қарағанды облысының Құрметті азаматы Қасымбек Медиев және басқа да қонақтар қатысты.
– Бүгін бізде өте маңызды мереке атап өтілуде. Өткен ғасырдың 30-жылдары қазақ халқы көп нәрсені бастан кешірді. Сол кезде халық мүддесін қорғаған ұлы қайраткерлердің бірі Сәкен Сейфуллин болатын. Сол бір қиын-қыстау заманда көптеген қазақтар өз өмірін Отан үшін беруге дайын болатын. Біз осы бір ержүрек батырларымызды мәңгілік естен шығармай, болашақ ұрпаққа олар туралы айтып отыруымыз керек, – деді облыс әкімінің орынбасары Абзал Нүкенов құттықтау сөзінде.
Мерейтойда жаңаарқалықтар 10 мың литр қымызды бір мезетте күбіде пісіп, әлемдік рекорд орнатты. Оған ауданның 12 ауылы мен екі кентінен жиналған 1 000 адам қатысты.
– Мен бұл рекордты жазу үшін арнайы Кубадан ұшып келдім. Ол дайындалған сусын көлемі, акцияға қатысушылар саны және пайдаланылған ыдыстар бойынша саналады. Бізде түрлі рекордтар көп, бірақ осындай рекорд алғаш тіркеліп отыр. Барлығын тексердік, өлшеп қойдық. Бір ай ішінде осы рекордтың нәтижесі біздің сайтта жарияланады, – деді Гиннес рекордтар кітабының өкілі Юделькис Диас.
Осыдан кейін Юделькис Диас қымыз бен бауырсақтан дәм татты. Оған қымыздың дәмі ұнапты.
– Бүгін Жаңаарқа ауданының 90 жылдығы мен Сәкен Сейфуллиннің туғанына 125 жыл толуына орай, үлкен шара өтуде. Осыған байланысты мұнда рекорд орнатылды. Қазақстанда мұндай рекорд алғаш рет тіркеліп отыр. Бұл өте қиын. Себебі қазіргі заманда күбі табу оңай емес. Ал мұнда мың күбі болды. Бұл рекордты болашақта жаңарту қиын болады деп ойлаймын, – деді Гиннестің рекордтар кітабының Қазақстандағы ресми өкілі Бақытжан Тастүлеков.
Аудан әкіміне Жаңаарқа ауданының басшылығына рекорд орнатылғанын куәландыратын сертификат табыс етілді.
– Бұл бір керемет іс-шара болды. Бір мезетте күрпілдеген мың күбінің дауысы Сарыарқаның сәнін келтірді. Жаңарқа ауданының әкімдігіне, атсалысқан барлық ауыл, елдімекен тұрғындарына алғысым шек-
сіз, – дейді айтыскер ақын Аманжол Әлтай.
– Біз жаңаарқалықтар мен ұлттық сусынымызды бүкіл әлем танитынын мақтан тұтамыз. Қымыз өте пайдалы. Біздің Ералиев ауылынан 100 әйел өзінің күбісін, бие сүтімен және қымыз жасайтын ұйытқысын алып келді. Біз барлығына бірдей киім тіктік, күбіні эмблемамен безендірдік, – деп атап өтті акция қатысушысы, мұғалім Аманкеш Нышанбаева.
Қазақстандық рекорд туралы ақпарат Гиннестің рекордтар кітабының сайтында бірнеше апта ішінде жарияланатын болады.
Шараға арнайы жазылған Жаңаарқа вальсін ұлттық киім киген жұптар орындады. Рекорд жазып, ресми сертификат берілгеннен кейін мереке жалғасын тапты. Аудан тұрғындары мен қонақтары үшін қазақша күрес, бәйге және вокалдық және би ұжымдарының қатысуымен концерт ұйымдастырылды.
– Мерейтой шығынына аудандық бюджеттен бір тиын бөлінген жоқ. Ауданның қалталы азаматтары, осы өңірдің Нұр-Сұлтан, Алматы, Қарағанды, Жезқазған секілді қалаларда қызметте жүрген тумалары ел намысы деген патриоттық сезіммен той әзірлігіне ерте бастан-ақ кірісіп кетті. Өндіріс орындары мен бюджеттік сала қызметкерлері біркүндік жалақыларын ерікті түрде аударып, елдегі тойға елеулі үлес қосты, – дейді аудан әкімі Юржан Бекқожин.
Мереке Атасу кентінен үш шақырым жерде орналасқан Қарауыл төбеде өтті. Мұнда 60-тан астам киіз үй тігілді. Әртүрлі алаңдарда қазақ күресі, аударыспақ, түйе палуан және қол күрес ұлттық спорт жарыстары өткізілді. Гала-концертте қазақстандық және шетелдік эстрада жұлдыздары өнер көрсетті. Сондай-ақ іс-шара аясында «Жыр сұңқар» сыйлығын үздік ақындарға тапсыру рәсімі өтті.
Ләззат ҚОЖАХМЕТОВА,
Қарағанды облысы