Ұрылар соңғы екі жыл аралығында жайылымнан 20 бас ірі қара мал мен 58 бас жылқыны қолды еткен. Облыстық Полиция департаменті баспасөз қызметінің мәліметінше, 2019-2020 жылдар аралығында Сарыағаш, Төлеби, Сайрам, Түлкібас, Бәйдібек, Ордабасы аудандарының полиция бөліміне 23 жәбірленуші арызданған.
Ауыл тұрғындарының айтуынша, белгісіз біреулер олардың қора-жайлары мен жайылымнан ондаған малын ұрлап кеткен. Жәбірленушілерге келтірілген шығынның жалпы көлемі 40 миллионға жуық теңгені құраған. Осыдан кейін полицейлер шұғыл іздестіру іс-шараларына кірісіп, Криминалды полиция басқармасы мен аудандық полиция бөлімдерінің қызметкерлерінен жедел-тергеу тобы құрылған.Нәтижесінде жедел уәкілдер екі бірдей қылмыстық топтың ізіне түсіп, оларды қыркүйек айының басында Сарыағаш, Төлеби аудандарымен Шымкент қаласындағы тұрғылықты мекенжайларынан ұстаған. Белгілі болғандай, 5 адамнан құрылған қылмыстық топтың бірі ұрланған малды жүк көлігіне артып, әкетіп отырған. Ал, екінші қылмыстық топ өздерінің арнайы қора-жайларында ұрланған малды жасырып ұстап отырған.
«Бүгінгі таңда осы қылмыстарға қатысы бар деген 8 күдікті қамауға алынды. Олар Түркістан мен Шымкент қаласының тұрғындары болып шықты. Күдіктілердің бесеуі бұрын да осыған ұқсас қылмыс жасап, сотты болғаны анықталды. Сондай-ақ, ұрланған малдарды сатып алып отырған 4 тұлға ұсталған. Күдіктілерден 42 бас жылқы табылып тәркіленіп, оларды полицейлер заңды иелеріне қайтарған. Қазіргі уақытта аталған жайт бойынша сотқа дейінгі тергеу амалдары жүргізілуде», делінген хабарламада.