Алматылық әйел полицияға көпқабатты үйдің шатырында ұйымдастырылған би кешіне қатысты шағымданған.
Алматылық әйел Facebook арқылы Алмалы аудандық полиция бөлімінің бастығы Есен Ысқақовқа: «Мен сіздің атыңызға өтініш жаздым. Байзақов көшесі, 170 мекенжайында орналасқан 9 қабатты үйдің шатырында әр аптаның жұма және сенбі күндері дискотека ұйымдастырылады. Музыканың дауысының қаттылығы сонша бүкіл ауданға естіледі. Сізден осы мәселеге қатысты шара қолдануыңызды сұраймын», – деп шағымданды.
Полиция қызметкерлері бұл шағымды негізге ала отырып, тәртіп бұзушыларға айыппұл салған. «Шағым бойынша Алмалы аудандық полиция бөлімінің қызметкерлері шұғыл шара қолданды.
Байзақов көшесі, 170-үй мекенжайында орналасқан 9 қабатты үйдің шатырын тексерді, кінәлілерге 434-2 бап – «Қоғамдық орындардың ластануы», 440-бап - Алкогольдік ішімдіктер ішу немесе мас күйінде қоғамдық орындарда жүру бойынша хаттама толтырылды», – деді Есен Ысқақов. Пәтер иесіне 13 890 теңге айыппұл түрінде әкімшілік хаттама толтырылды.
