Қала тұрғындарының дүрлігуіне мәйіттің көпқабатты үй ауласындағы балалар ойнайтын алаңда жатқаны себеп болып отыр.
Жансыз денені түн жарымда ең алғаш осы маңның тұрғындары байқаған. Тәртіп сақшылары мен жедел жәрдемге хабар беріпті. Дәрігерлер оқиға орнына жеткенше, белгісіз адам жан тапсырған дейді.
«Көп қан жоғалтқаннан қайтыс болған» деген болжам айтылды. Себебі, марқұмның екі жерінде дене жарақаты бар. Ал оған кім өткір зат сұғып алғаны әзірге белгісіз. Тәртіп сақшылары тергеу құпиялығына байланысты толық ақпарат бермеді. Белгілісі, адам өлтіру бабымен сотқа дейінгі тергеу басталды.
Павлодар облыстық жедел жәрдем стансасы бас дәрігерінің орынбасары Ирина Мищенко: «Біздің жедел жәрдем бригадасы небәрі төрт минутта оқиға орнына жетті. Алайда бұл кезде белгісіз адам жан тапсырған. Марқұмның кеудесі мен ішіне өткір зат кірген. Содан көп қан жоғалтқан деп ойлаймын. Дегенмен нақты себебі сараптамадан кейін белгілі болады», – дейді.
