Президент Қасым-Жомарт Тоқаевтың бастамасымен қолдау тапқан BIRGE жалпыұлттық акциясы аясында ел тұрғындарының ұсыныс-тілектері жинақталып, тіркелгенін білеміз. Аталған акция шеңберінде Жамбыл облысы бойынша 30 мыңнан аса ұсыныс-тілек келіп түскені де белгілі болды. Қазіргі таңда ұтымды ұсыныстар сараланып, тиісті жауапты мекемелерге үлестіріліп, сол бағытта атқарылатын жұмыстар Nur Otan партияcының бақылауына алынған.
Түскен ұсыныс-тілектердің бірқатары – баспана, жұмыссыздық, жол және ауызсу мен елдімекендерге көгілдір отын жеткізу мәселелері. Әсіресе, облыс іргесіндегі Байзақ ауданы тұрғындарынан түскен ұсыныстардың дені –ауылға газ тартып, оны үйді-үйге кіргізу құнының қолжетімді болуы.
Бүгінде Байзақ ауданында 43 елдімекеннің 60 пайызы көгілдір отынмен қамтылып, тұрғындарға тұрақты газ берілуде. Аудан аумағындағы газдандырылмаған елдімекенді газдандыру мақсатында 9 ауылға газ құбырын тарту жұмыстары жүргізіліп жатыр. Бұл – биылғы меже. Ал алдағы екі жылда 21 елдімекенге кезең-кезеңімен көгілдір отын жеткізу жоспарланды. Құрылыс жобасының жалпы құны – 3,46 миллиард теңге.
Аудандағы басты проблема көгілдір отынның тек ауыл іргесіне келіп тоқтауы болып отыр. Тұрғындар газды өз қаражатына тартуға мәжбүр. Партия жанынан құрылған комиссия бұл мәселенің оңтайлы шешілуі үшін мердігер компанияға газ құбырын көше-көшемен тартуды міндеттеу немесе байқау жариялағанда осындай нұсқауларды енгізу қажеттігін ұсынды. Бастама жергілікті атқарушы орган тарапынан ескерілетін болса, көгілдір отын есік алдына дейін жеткізіледі.
Байзақ ауданының тұрғындарын толғандыратын тағы бір мәселе – автожолдардың жөнделуі. Ауданды облыс орталығымен байланыстыратын үлкен жолдың бірқатар бөлігі сын көтермейді. Тараз қаласына тіке апаратын күретамыр да – сол жол. Жүк көліктері де жиі қатынайды. Енді азаматтардың тілегінің орындалуы партия назарына алынды. Облыстық маңызы бар «Тараз-Сарыкемер-Түймекент-Ақшолақ» автожолының 3,4-4,4 шақырым аралығын жөндеу жұмыстары күн тәртібінде тұр. Қазіргі кезде мердігер компания анықталып, құрылыс жұмыстары басталды. 2,5 миллиард теңге қаражатты құрайтын жоба келесі жылы толық пайдалануға берілмек.
Сондай-ақ «Тараз-Жетібай-Тегістік-Ойық» автожолын жөндеу жұмыстары да жіті бақылауға алынған. Жалпы құны 825 миллион теңге қаражатты жобалайтын жөндеу жұмыстары биыл басталды. Аталған автожолдың 7-60 шақырым аралығына орта жөндеу жұмыстарын жасау
2020-2022 жылдар аралығында іске асырылады.
Автомобиль жолын жөндеу мәселесі бойынша Тұрар Рысқұлов ауданы тұрғындары да BIRGE жалпыұлттық акциясы аясында ұсыныс-тілегін жолдады. Жалпы ұзындығы 8,8 шақырымды құрайтын аудандық маңызы бар екі автожолды жөндеу жоспарланып, Қарақау ауылына кіреберіс жол мен Төреңөзек-Көкарық-Шолақ-Қайыңды автожолына орташа жөндеу жұмыстары жүргізілді. Сондай-ақ биыл аудан бойынша ұзындығы 22 шақырымнан асатын 23 көше жолы жөнге келтіріледі. Құрылыс жұмыстарын қазан айында аяқтау жоспары бекітілді.
BIRGE жалпыұлттық акциясы аясында жинақталған жергілікті атқарушы органдардың құзіретіне кіретін ұсыныс-тілектердің орындалуы партия бақылауында болып, халыққа атқарылған жұмыстар бойынша мәліметтер жеткізіледі.
Жамбыл облысы