Жастар жылы аясында жас мұғалімдердің мәртебесін көтеру, олардың бастамаларын қолдау мақсатында бүгін «Балдәурен – Қапшағай» республикалық оқу-сауықтыру орталығында «Үздік педагогикалық «Жастар» тобы – 2019» байқауы бастау алды.
«Балдәурен» Республикалық оқу-сауықтыру орталығы 2002 жылы тұңғыш Президентіміз Н.Ә.Назарбаевтың тапсырмасы бойынша «Артек» Халықаралық балалар орталығы үлгісінде құрылды. Бүгінде орталықтың Қапшағай, Шымкент, Балқаш қалаларында филиалдары ашылған. «Балдәурен» орталығының ең басты артықшылығы – ұйымдастырушы-ұстаздар. Олар бірінші болып балаларды қарсы алып, олармен ең соңғы болып қоштасады. Ұйымдастырушы-ұстаздардың барлығы жас, таусылмайтын қуатқа, шығармашылыққа және педагогикалық талантқа толы. Орталықта құрылған «Жастар» педагогикалық тобы – «Балалардың армандары аралында» балаларға қуанышты минуттар сыйлауға тырысатын, пікірлес адамдар тобы. Бұл сайыста төрт орталықтың педагогикалық топтары бәсекеге түседі.
Байқау «Балалық шаққа қызмет ету» концерттік бағдарламасы; «Бриколаж» топ бөлмесін безендіру; «Менің мотивациям» тәрбие кешені меңгерушілерінің жоба қорғау байқауы; «Ұйымдастырушы-ұстаз қоржыны» байқауы; «Әлем таныған ұлы Абай» бейнеролик байқауы; спорт түрлерінен жарыстар сынды бірнеше кезеңнен тұрады.
Сайыс екі күнге созылып, қорытындысы 28 қыркүйек күні сағат 11:00-де Алматы қаласындағы Достық үйінде ұйымдастырушы-ұстаздардың балдәурендіктермен кездесу және байқау қорытындыларын шығарумен аяқталады.
Адия Каиржанова