Nur Otan партиясы Алматы облыстық филиалы кейінгі кездері елдегі ең өзекті де өткір мәселелердің біріне айналып, қоғамдық пікірлер туындауына өзек болып, жұртты алаңдата бастаған көпбалалы аналар мен әлеуметтік аз қамтылған отбасылардың тұрмыстық жағдайын оңалту, баспанамен қамту, жәрдемақы, атаулы әлеуметтік көмектерді дер кезінде әрі толық төлеуге баса назар аударып, мүмкіндігінше жағдайды шиеленістірмеуге күш салуда.
Партия филиалы жанынан көпбалалы аналар мен әлеуметтік аз қамтылған отбасылардың ісі жөніндегі тұрақты комиссия құрылып, іске кірісті. Осы комиссияның алғашқы отырысы өткізіліп, оған Алматы облысы әкімінің орынбасары Батыржан Байжұманов қатысты. Комиссия құрамына есімдері өңірдегі елге жақсы танымал, түрлі салада табысты қызмет атқарып жүрген 35 адам енгізілді. Облыстық партия филиалы төрағасының бірінші орынбасары Гүлнар Тойлыбаева комиссия төрағасы болып бекітілді. Комиссия білім беру, денсаулық сақтау, әлеуметтік бағдарламалар мен жұмыспен қамтуды үйлестіру басқармалары басшыларынан, «Атамекен» кәсіпкерлер палатасы, ата-аналар комитеті, іскер әйелдер қауымдастығы мен аналар кеңесінің өкілдерінен жасақталды.
Күн тәртібіндегі өзекті мәселе – көпбалалы отбасылардың бүгінгі жағдайын анықтап, саралау, шынайы мұқтаж жандарды баспанамен қамту, жұмысқа орналастыру, қолдарынан келетін іс бойынша кәсіпкерлікпен шұғылдануға тарту мәселелерін ұйымдастырудың алғышарттары жөнінде ақылдасқан комиссия мүшелері алдағы кезде жұмысты ретке келтіріп, жоспарды бекіту жайлы ойларын ортаға салды. Басты назарды Талдықорған қаласындағы қордаланған мәселелерге ғана аудармай, алыста жатқан шалғай ауылдардағы аналар мен балалардың жағдайын бірінші кезекте ойластыру қажеті айтылды. Сонымен бірге, комиссия құрамына БАҚ және құқық қорғау саласының өкілдерін қосу, осындай тұрақты комиссияларды аудан, қалаларда да құру туралы ұсыныс қолдау тапты. Тұрақты комиссия ай сайын отырыс өткізіп, атқарылған жұмыстарды қорытындылап, алдағы міндеттерді пысықтап отырмақ.
Болат АБАҒАН,
Алматы облысы