Дәрігерлер Шамалғанда болған жол апатында зардап шеккендердің жағдайы туралы айтты. Бұл туралы «Қазақпарат» хабарлайды.
«5 жастағы баланың жағдайы әлі ауыр. Динамикасы жақсарып келеді, сөйлейді, тамақ ішеді. 3 жастағы қыз бала комада жатыр, жасанды тыныс алусыз өзі демалады. Зардап шеккен әйелге №7 қалалық клиникалық емханада ота жасалды, жағдайы - орташа . Ота сәтті өтті», - деп хабарлады Алматы қалалық денсаулық сақтау басқармасы.
15 қыркүйек күні Шамалған стансасындағы теміржол өткелінде пойыз бен автобус соқтығысты. Оқиға орнында автобус жүргізушісі мерт болып, тағы 3 адам Қарасай аудандық ауруханасының жансақтау бөліміне түсті. Олар – анасы мен 5 және 3 жастағы балалар. 22 қыркүйек күні сәбилердің бірі ес жиғанын жазған болатынбыз. Аталған факті бойынша ҚР ҚК-нің 345-бабы 3-бөлігі бойынша іс қозғалып, тергеу жүріп жатыр. Істің тергелуін Бас көліктік прокуратура бақылауына алды.