Италияда жалауы желбірейтін жарыс 24 қыркүйекте басталады. Аталған әлем біріншілігіне тек «элита» санатындағы спортшылар ғана қатыса алады. Жылдың ең маңызды додасына Қазақстан құрамасы сапынан 6 велошабандоз жарыс жолына шығады. Олар: Алексей Луценко, Жандос Бижігітов, Дмитрий Груздев, Даниил Фоминых, Юрий Натаров және Вадим Пронский.
Айта кетейік, өткен маусымда қазақстандық велошабандоздардың сәтті өнер көрсетуі ұлттық құрамаға әлем чемпионатына толық құраммен қатысуына мүмкіндік сыйлады. Сондай-ақ Дмитрий Груздев пен Даниил Фоминых жекелей сынға түсуге өтінім беріп отыр. Ал топтық кезеңде қазақстандық спортшылар жарысты толық құраммен бастайды. Бұл жарыс барысында жақсы нәтижеге қол жеткізуге септігін тигізеді.
Велоспорттан Қазақстан ұлттық құрамасының бас бапкері Асан Базаев тасжолдың қиын әрі таулы екенін айтты.
– Жарыс 9 айналымнан тұрады. Әр айналымда тауларға екінші санаттағы 6-7 шақырым, ұзындығы 2,7-2,8 шақырым, орта есеппен 6 пайыз көтерілу болады. Таулы жерлер қиын емес. Әдетте мұндай жолда қиындықтар 200 км қашықтықта басталады. Негізінде, бұл жарыс жолы Алексей Луценко үшін өте ыңғайлы болмақ. Ол осы әлем чемпионатында команданың капитаны болады. Біздің командамыздағы 6 адам Алексейдің мәреге жақсы формада сәтті жетуіне жағдай жасайды. Алексей өзін «Тур де Франста» жақсы қырынан көрсетіп, бабында екенін дәлелдеді, – дейді бас бапкер.
Қазақстан құрамасы әлем біріншілігіне «элиталар» санатында толық құраммен соңғы рет осыдан 11 жыл бұрын Швейцарияда қатысқан еді. Биылғы дүниежүзілік чемпионат бастапқыда Швейцарияда өтеді деп жоспарланған. Алайда коронавирус пандемиясына байланысты жылдың басты додасы Италияға ауыстырылды. Жарыс 27 қыркүйекке дейін жалғасады.
