– 2023 жылға қарай медицина қызметкерлерінің еңбекақысын бүкіл экономикадағы орташа жалақыдан екі есе жоғары деңгейге жеткізу міндеті қойылып отыр. Медициналық-санитарлық алғашқы көмек беру ісін дамытуға баса мән беріледі. Өкінішке қарай, біз бұл салаға уақытында назар аудармадық. Эпидемия мұндай көзқарастың қате екенін көрсетті. Қазір жіберген қателіктерге көңіл бөліп, оларды түзетуіміз керек. Әрине, медицина әрдайым басты назарымызда болады, – деді Қасым-Жомарт Кемелұлы.Ол коронавирустың ықтимал жаңа толқынына дайын болудың маңызды екенін атап өтті. Сондай-ақ азаматтарымыздың өмірі мен денсаулығын сақтау үшін барлық ресурсты жұмылдыру қажетін айтты.
– Бүкіл әлемдегі жағдай күрделі. Еуропа мен Американы коронавирустың екінші толқыны басып жатыр. Осындай жағдайда біз қырағылық танытып, дайын отыруымыз қажет. Пандемияның бірінші толқынынан жақсы сабақ алдық. Бұл тәжірибенің пайдасы болады. Сөзсіз, қиын болды, қателіктер жіберілді, Денсаулық сақтау министрлігі тарапынан да ағаттықтар кетті. Қателіктерді жұмыс барысында жөндеуге тура келді. Дегенмен тіпті ауыр болса да кез келген тәжірибенің пайдасы бар. Сондықтан екінші толқынға дайын болайық! Бүкіл дүниежүзімен, халықаралық қоғамдастықпен бірге барлық қиындықты лайықты түрде еңсеруге тиіспіз, – деді Президент.Кездесу соңында Мемлекет басшысы пандемияға қарсы күрестің күрделі жағдайында атқарған қажырлы еңбектері үшін дәрігерлерге ризашылық білдірді. Қ.Тоқаев Алматының индустриялық аймағында орналасқан «КСМ Техновид» ЖШС-ның энергия үнемдейтін, сәулетті қасбеттер зауытының жұмысымен танысты. Президентке кәсіпорынның өнімдері таныстырылып, құрылыс материалдары өндірісінің технологиялық процесі паш етілді. Мұнда 250-ден астам адам жұмыс істейді. Компанияның жобаға салған жеке инвестициясы 3,8 миллиард теңгені құрайды. Зауыттың қуаттылығы жылына 475 мың шаршы метр шыныпакет шығаруға жетеді.
Мемлекет басшысы Республика алаңындағы қайта жөндеуден өткен «Алмалы» демалыс аумағына барды. Жаңартылған аумақ бірнеше бөлікке – балаларға және мәдени ойын-сауыққа арналған аймақтарға бөлінген. Онда қазақ суретшілері салған мүсіндер қойылып, ауқымды көгалдандыру жұмысы жүргізілген.
Қасым-Жомарт Тоқаев жеңіл көлік шығаратын қазақстандық Hyundai Trans Kazakhstan зауытының іске қосылуға дайындығын тексерді. Президент автомашиналарды құрастыру процесімен танысып, 2020 жылғы 15 қазанда ашылады деп жоспарланған ұсақторапты құрастыру әдісімен автомобильдер шығаруға арналған жаңа цехты аралап көрді. Кәсіпорын пайдалануға берілгеннен кейін І кезеңде жылына 30 мың, ІІ кезеңде 45 мыңға дейін машина жасауға қабілетті болады.
Мемлекет басшысы нысанды аралап көргеннен кейін индустриялық аймақ резиденттерімен жеке кәсіпкерлікті қолдау және кәсіпорынның басым салаларын дамыту мәселелерін талқылады.
– Мен өз Жолдауымда еліміздегі кәсіпкерлікті дамытуға ерекше мән бердім. Әсіресе, бизнестің дамуына мемлекеттік органдар тарапынан келтірілетін кез келген кедергі елімізге қарсы жасалған қылмыс ретінде қаралатынына арнайы тоқталдым. Яғни, басқаша айтқанда Үкімет, жергілікті атқарушы органдар кәсіпкерлікті дамытуға жан-жақты қолдау көрсетуге тиіс, – деді Президент.Бұл – экономикалық саясаттың негізгі бағыты болады.
– Нарықты монополистерден тазалау керек. Барлық лайықты кәсіпкердің біздің нарыққа еніп, еркін жұмыс істеуіне мүмкіндік беру қажет. Сонда ғана экономика еркін дами алады. Мұның бәрі жаңа ұйымдастыру шараларын қабылдауды талап ететіні сөзсіз. Бұл шаралар тиімді болады деп үміттенемін, – деді ол.Қ.Тоқаев көпфункционалды SEN музыкалық орталығында да болды.
Айхан ШӘРІП