Алматының «Қайраты» күтпеген жерден ұпай жоғалтты. Футболдан ел біріншілігінің 11-кезеңінде турнир кестесінің үздіктері көкшетаулық «Оқжетпеспен» кездесті. Бұл туралы Aikyn.kz тілшісі хабарлайды.
Кездесу алдында ойынның фавориті есебінде «Қайрат» клубы аталды. Алайда алматылықтар өздеріне қатты сеніп кетті ме, әлде қарсыласын тиісті түрде бағалай алмады ма, жоқ жерден тең ойынға қанағат тұтты. Алғашқы болып есепті көкшетаулықтар ашса, артынша «Қайрат» екі гол салып, алдыға шықты. Бірінші тайм аяқталар тұста «Оқжетпес» ойынды теңестіріп кетті.
Екінші тайм да тартысты басталды. Қарымта шабуылдардың бірінде «Оқжетпес» ойыншысы Дмитриев дубльдің авторы атанды. «Қайрат» бар күшін салғанмен қарсылас қақпасын бір рет қана дәлдей алды. Қорытынды есеп – 3:3.
Турнир кестесіндегі «Қайраттың» ең жақын қарсыласы «Астана» клубы Талдықорғанның «Жетісуын» 3:0 есебімен тізе бүктірді.
