Праймериз кандидаттарының кезекті дебатына келген «Nur Otan» партиясы Атырау облыстық филиалы төрағасы, облыс әкімі М.Досмұхамбетов «Nur Otan» партиясы мүшелері мен праймериз кандидаттары алдында сөз алды.
«Қазіргі партия тарапынан өтіп жатқан праймериз партия Төрағасы, Елбасы Нұрсұлтан Назарбаевтың 2019 жылғы 17 тамызда өткен кеңейтілген саяси кеңес отырысында берген «Сенім. Диалог. Болашаққа нық қадам – «Nur Otan» партиясының 7 серпіні» атты партия жұмысын жүйелі жаңғырту бағдарламасы аясында партияға «қайта жандандыру» тапсырмасынан туындайды. Праймериздің негізгі мақсаты – партияішілік сайлауда өндіріп іс атқаратын, ел алдына шығар көшбасшыны таңдау. Праймериздің міндеті – «Мықты лидерлер – мықты партия» қағидаты бойынша шынайы және мықты көшбасшыларды партия қатарына тарту. Кандидаттар облыс тұрғындарын толғандыратын өзекті мәселелерді көтеріп, нақты шешу жолдарын ұсынатындарына сенімдімін. Әр кандидаттың сайлауалды бағдарламалары партия платформасына, Президент Жолдауына және облыстық партия сайлауалды бағдарламасына негізделген. Сондықтан тартысты, әсерлі пікір сайыс күтеміз», – деп кандидаттарға сәттілік тіледі.
«Теңізшевройл» компаниясының менеджері, Қазақстанның Еңбек Ері Руслан Қуатов, «Қазақстан Жилстройбанк» АҚ-ның Атырау облыстық филиалының директоры Нұрбол Құрман, Атырау музыка колледжі «Д.Нұрпейісова атындағы Халықтық музыка Академиясының» директоры Гүлнара Садуахасова, «Қазақстан темір жолы» ұлттық компаниясы» АҚ-ның Атырау магистральдық желі бөлімшесі филиалы директоры, «Құрметті теміржолшы» Елеубай Сапаров, С.Өтебаев атындағы мұнай және газ университетінің жастар саясаты мен мәдениеті бөлімінің жетекшісі Абылай Құрметұлы, «Фатима Групп» ЖШС директоры, өзін өзі ұсынушы кандидат Фатима Тулеева қатысқан жарыссөз олардың әрқайсысының да мақсаттарын жүзеге асыруға деген ниетін аңғартты. Махамбет атындағы академиялық қазақ драма театрына келген партия мүшелері жарыссөзге қатысушы кандидаттардың бағдарламалары мен сауалдарға берген жауаптарын ықыласпен тыңдап, қолдау білдірді.
Жарыссөз сәтті аяқталып, аймақ басшысы тартысты, әсерлі пікірсайыс өткізе алған кандидаттарға сәттілік тіледі. Партия мүшелері 1-3 қазан аралығында дауыс беруге белсенді қатысып, дұрыс таңдау жасайтынына сенім білдірді.
Айтар болсақ, Атырау облысы бойынша партияішілік іріктеу – праймеризге 408 адам ұсынылып, оның 404-і кандидат ретінде тіркелді. Сондай-ақ белгілі себептерге байланысты 4 кандидат праймериз науқанынан шығарылып, бүгінгі күні 400 кандидат жұмыс жүргізуде. Праймериз ережесіне сай үгіт- насихат жұмыстарының бірі – жария пікірсайыс. Пікірсайысқа қатысу кандидаттар үшін міндетті және маңызды. Осы мақсатта облыс бойынша 39 жария пікірсайыс өтетін орындар дайындалды. Дебатқа қатысушы кандидаттарға жеребе ұйымдастырылып, 70 пікірсайыс өткізу кестесі бекітіліп, өтетін ғимараттардың материалдық-техникалық жабдықтарын қамтамасыз ету мен санитарлық талаптарға сәйкестендіру бойынша жұмыстары жүргізілді.
Атырау облысы бойынша 53 пікірсайыс өтіп, оған 310 кандидат қатысты. 30 қыркүйекке дейін 17 пікірсайыс өткізу жоспарлануда. Қазіргі таңда облыс, қала және аудандық партия филиалдарының сайлауалды бағдарламаларының жобалары бар, кандидаттар партия мүшелерімен кездесулер барысында ұсыныстар мен аманаттар жинақталды. Бұл ұсыныс-тілектер бағдарлама жобаларына енгізіледі.
Тұрсын ЖҰМАБЕКҚЫЗЫ,
Атырау облысы