Осы жылдың 17 тамызында басталған, бірнеше кезеңнен тұрған партияішілік іріктеу жетекші партия тарихындағы ауқымды жоба болды. Праймериз – қоғамның дамуына өз үлесін қосуға ынталы, белсенді әрі тың идеялары көп азаматтар үшін таптырмас мүмкіндік. Сондықтан бағымды сынап, партияішілік іріктеуге қатыстым.
«Nur Otan» партиясының белсендісі ретінде «партиялық тізімдердің сапалық құрамында 35 жасқа дейінгі жастардың үлесі 20 пайыз болуы шарт» деген ұстанымды қолдаймын. Бұл «Еріктілер жылында» ел дамуына атсалысып, жанашыр азамат, білікті маман ретінде танылған жалынды жастарға нақты қолдау деп білемін. Осы ретте «Жастар – қоғамның қозғаушы күші» деген сөзді басшылыққа алар болсақ, жетекші партия жастардың білімін, жастық жалынын, тың, жаңа идеяларға бай көзқарасын мемлекет дамуына бағыттаса, ашық азаматтық қоғамның қалыптасуына да негіз болады деп есептеймін.
Мен болашақта жүзеге асырсам деген бағдарламама өзім туып-өскен Сырдария ауданының әлеуметтік-экономикалық дамуының басым бағыттарын кірістірдім. Оның ішінде «Nur Otan» партиясы тарапынан қабылданған бағдарламалардың сапалы жүзеге асуына атсалысу арқылы аудан тұрғындарының талап-тілектері мен ұсыныстарын жергілікті атқарушы билікке жеткізіп, мәселелерінің шешілуіне ықпал етуді жоспарлап отырмын. Бұдан бөлек, ашықтық пен қолжетімділік қағидатын ұстану негізінде шалғай ауылдардағы кәсіпкерлікке ынталы азаматтарға мемлекет тарапынан көрсетілетін қолдаулар жөнінде түсіндірме жұмыстарын жүргізуді үйлестіру қажет деп санаймын. Сондай-ақ аз қамтамасыз етілген және көпбалалы отбасыларды назардан тыс қалдырмай, тұрақты түрде әлеуметтік көмек алуын бақылауда ұстаудың маңызы зор. Осындай нақты мақсат-міндеттер бойынша білімімді, тәжірибемді ауданымның дамуына жұмсау – менің парызым.
Праймериздің дауыс беру кезеңінің қорытындысы бойынша, «Nur Otan» партиясының Сырдария ауданындағы 2 032 мүшесі, яғни дауыс берушілердің 70 пайызы маған сенім артыпты. Бұл – үлкен қуаныш әрі зор жауапкершілік. Сенім артып, дауыс берген партияластарымның сенімі мен үмітін ақтау жолында еңбек ететін боламын. Қазақстанда тұңғыш рет ұйымдастырылған партияішілік іріктеуге белсене қатысқан барлық азаматтарға ризашылығымды білдіремін.
Ақтөре ИБРАГИМҰЛЫ,
Сырдария аудандық «Тіршілік тынысы» газетінің бас редакторы,
«Jas Otan» Жастар қанаты Сырдария аудандық
бөлімшесінің басшысы
