Облыс әкімі Махамбет Досмұхамбетов: «Бүгін біз қаламызда тағы бір білім ордасын ел игілігіне беру салтанатына қатысып отырмыз. Заман талабына сай жаңғыруға қадам басқан еліміз білімді ұрпақ тәрбиелеуге ден қойып отыр. Өйткені дамыған кез келген мемлекеттің басты байлығы сапалы білім алған саналы азаматтар екенін көріп отырмыз. Сондықтан ұстаздар мен оқушылардың алаңсыз білім алуы үшін бар жағдайды жасауымыз керек. Қалада апатты жағдайда тұрған екі мектептің бірі осы Ғани Мұратбаев атындағы орта мектеп болатын. Енді жоғарыдағыдай проблемасы бар бір мектеп қана қалды. Сонымен бірге бұл мектептің оқушылары оқып келген Исатай Тайманов атындағы орта мектептің үш ауысымда оқыту мәселесі де өз шешімін тапты», – деді.Аймақта үш ауысымды және апатты жағдайдағы мектептерді азайту жұмыстары жалғасын табады. Апатты жағдайдағы №1 Мағжан Жұмабаев атындағы орта мектеп орнына алдағы уақытта 160 орындық жаңа ғимарат салу жоспарлануда. Ал қала мектептеріндегі орын тапшылығын шешу мақсатында 4 мектептің жанынан қосымша 120 орындық жапсаржай құрылыстары салынды. Бұдан бөлек, биыл «Самал» ықшамауданында 600 орындық, «Береке» ықшамауданында 1 200 орындық, Дамбы ауылында 300 орындық жаңа мектеп құрылысы жүргізілуде. Аймақта білім деңгейі алдағы жылдары жоғары көтерілетініне сенім мол. Өйткені жыл сайын облыс бюджетінің басым бөлігі білім саласына бағытталуда. Аймақ басшысы М.Досмұхамбетов жаңа мектеп табалдырығын аттаған ұстаздар мен оқушыларды құттықтап, білім беру ұйымдарының материалдық-техникалық жағдайын жақсартуды жалғастырып, оқушыларды жаңа оқулықтармен, тегін ыстық тамақпен қамтамасыз ету жұмыстары да жоспарлы түрде жүргізілетінін айтты. Салтанатты шарада жарты ғасырдан астам тарихы бар мектептің алғашқы түлегі, ардагер ұстаз Маруся Бітімәлиева сөз алып, өзі оқыған мектептің ұстаздарына жемісті еңбек тіледі. Ал Жұмыскер шағынауданының тұрғыны Серік Мұсағалиев жаңа оқу ғимаратын ауыл тұрғындары асыға күткенін, қиын жағдайға қарамастан, мерзімінде бітіргені үшін облыс әкіміне алғысын білдірді. Атырау облысына іссапармен келген «Назарбаев зияткерлік мектептері» АҚ басқарма төрайымы Күләш Шамшидинова мен ардагер ұстаз Бөкен Ғұмар білім ордасының лентасын салтанатты жағдайда қиған соң шараға қатысушылар жаңа мектепті аралап көрді. Айта кетейік, Ғ.Мұратбаев атындағы 300 орындық орта мектептің құрылыс жұмыстарын «БатысСтройСервис-Атырау» ЖШС мердігер мекемесі жүргізді. Нысанның құрылысы өткен жылдың шілде айында басталды. 2 қабатты мектеп ғимаратында физика, химия зертханалары, акт залдар мен алаңдар, асхана, жаңа үлгідегі технология, информатика, Stem-кабинеттерімен жабдықталған. Сайып келгенде, қазіргі білім алудың қарышты дамыған жүйесіне сай оқу үшін жаңа мектептерде барлық жағдай жасалған. Енді оқушылар алдындағы міндет – жақсы білім алып, мамандық таңдауда адаспай, елге лайықты қызмет ету.
Тұрсын ЖҰМАБЕКҚЫЗЫ, Атырау облысы