Коронавирус тағы бір айналып соқса, біздің елде де әр бесінші кинотеатр жабылып қалуы мүмкін.
Қазір бұл сала жұмыс істеп тұрған жоқ. Ал, шығын 15 миллиард теңгеге дейін жеткен. Қызметкерлердің 60%-ы жұмысынан кетті. «Қалғаны өзге жұмыстарға жегіліп жүр», - дейді сала басшылары.
– Тек жылудың өзіне 2 млн қарызбын. Суға 500 мың теңге, электр жүйесіне берешегім 1млн 800 мың теңге болды. Жұмыскерлерге айлық төлейтін жағдай жоқ. 130-дан астам қызметкердің жартысынан көбі жұмыстан кетіп қалды, – дейді кинотеатр желісінің директоры Фарух Құдайбергенов.
Бұл – Қарағанды қаласындағы 400 орындық кинотеатр. Дәурені жүріп тұрған кезде танымал кинокомапниялардың талай туындыларын ізін суытпай көрерменге көрсетіп отырған. Алайда 7 айдан бері жағдай мүшкіл. Несие мен берешекті айтпағанда, коммуналдық төлем үшін 5 млн теңгеге қарызға кіріпті. Қызметкерлері де жаппай жұмыстан кетіп жатыр екен.
