Әкім ТҰРСЫН,
Алматы қаласы:
– Менің бір байқағаным, жоғары жақта, яғни партияның орталық аппаратында өзгеріске бет бұру басталып, қоғамды жаңғырту бағытында көптеген игі істер жасалып жатыр. Бірақ мәселенің бәрі аймақтарда сияқты. Өйткені партия мүшелері, атап айтқанда мұғалімдер мен дәрігерлер, бюджеттік мекеме қызметкерлері баяғы әдет бойынша кімге дауыс беру керек деген секілді жоғарыдан бұйрық күтіп отыратыны байқалды. Егер праймериз нәтижелеріне сараптама, аудан, қалаларға мониторинг жасасаңыз, жергілікті атқамінерлердің «өтініші» болмаған аймақтарда немесе әркім өз еркімен дауыс берген өңірлерде қатысушыларға дауыс беру деңгейі біркелкі болғанын көресіз. Арада көп айырмашылық жоқ. Ал кейбір аймақтарда көш бастаушылар мен олардың соңында қалған адамдардың жинаған дауысының арасында орасан зор айырмашылық бар. Бұл жерде дауыс берушілер өз дауысын қалауынша беруден әлі де сескеніп, басшылыққа мойынсынғанының салдары жатыр. Ал партия тарапынан ұйымдастырылған жұмыстарға қандай да бір мін тағу қиын. Тек бастауыш партия ұйымдары басшыларының праймеризге қатысқандары дауыс беруге әсер етті деп ойлаймын. Айталық, мектеп директоры қатысса барша мұғалім оған дауыс берері сөзсіз.
Екіншіден, әлеуметтік желілерде танымал тұлғалардың көбі өзін-өзі ұсынғандар екенін ескеру керек. Оларда тәжірибе жетіспеді. Әлеуметтік желілерге көбірек үміт артты. Ал әлеуметтік желі жалпыға ортақ дүние. Ондағы жақтас әр аймақтан, тіпті шетелден де болуы мүмкін. Ал дауыс беру үміткердің тіркелген аймағы бойынша өтті. Сондықтан әлеуметтік желі белсенділерінің көп дауыс жинай алмай қалғанына таңғалудың қажеті жоқ.
Үшіншіден, меніңше праймеризге қатысушылар міндетті түрде жеңуді емес, өз ойларын, жоспарларын, ұсыныстары мен бағдарламаларын көпшілікке таныстырып, партия назарына іліктіруді көздеген тәрізді. Өз басым дәрігерлер мәселесін көтердім. Оны жұртшылыққа таныстырдық. Кездесулерде айттық. Демек, қозғап жүрген мәселелерім әріптес, партияластардың да назарына ілікті деп ойлаймын. Ал онлайн дауыс беруге келсек, қалай болғанда да «Праймериз» ақпараттық жүйесі сынақтан сәтті өтті деп ойлаймын. Тіпті, Парламент Мәжілісіне депутаттар сайлауды осы жүйе арқылы өткізс де артықтық етпейді. Қазір технология заманы, демек ақпараттық технология игіліктерін барынша пайдаланған дұрыс.
Айдос ЖҰҚАНҰЛЫ,
Нұр-Сұлтан қаласы:
– Әлеуметтік желілерде танымал адамдардың дауыс аз жинауының себебі әртүрлі. Дәл өз басым әлеуметтік желілерде белсенділік танытқанымның мақсаты – көп дауыс жинау емес, танылу. Бұл болашақ стратегиялық жоспар деген сөз. Яғни, әлеуметтік желілер арқылы «Nur Otan» басшылары, қарапайым халық «Айдос Жұқанұлы қандай бағдарлама ұсынды, не жасап жатыр екен?» дегенді көрсін, білсін дедім. Ертең ұтылып жатсам, осындай мықты азаматтың ұтылғанынан ел қынжылсын, көрсін, көзі жетсін деген мақсатта әлеуметтік желілерде көп жарнама жасап, бағдарламамды ұсындым. Ал әлеуметтік желілерде танымал емес адамдардың ұтуының себебі қатысушылардың нақты кәсіпорындар басшылары болуында. Мысалы, Нұр-Сұлтан қаласы Есіл ауданында ең көп дауыс жинаған азамат «Нұрсұлтан Назарбаев халықаралық әуежайы» АҚ басқарма төрағасы. Ол 1,5 мыңнан астам дауыс жинады. Өйткені ол мекемеде мыннан асатын адам жұмыс істейді. Солардың көпшілігі «Nur Otan» партиясының мүшесі. Міндетті түрде олар басшысына береді. Сол сияқты барлық аудандарда алғашқы үштікке, бестікке, ондыққа кірген азаматтардың көп дауыс жинауына олардың кәсіпорын басшылары болғаны әсер етті. Олардың қол астындағы қызметкерлердің барлығы оларға дауыс берді. Болашақта праймериз өткізген жағдайда осыны партия басшылары ескерер деп үміттенемін.
Амангелді ҚҰРМЕТ