Қарағанды облысында бір күнде 6 500 ағаш отырғызылды. Үш мың тұрғын ағаш егу акциясына қатысты.
Қарағандыда салынып жатқан триатлон-парк аумағына 1 500 қылқан жапырақты және жапырақты ағаштар отырғызылды. Оларды егуге облыс әкімі, оның орынбасарлары, облыстық басқарма басшылары, спортшылар, қоғамдық ұйымдар, депутаттар қатысты. Триатлон-парк «Рухани жаңғыру» бағдарламасы бойынша «Көгілдір тоғандар» мен Оңтүстік-Шығыс шағынаудандарының аралығында салынуда. Бұл нысан жеке құрылыс компаниясының қалаға ұсынған сыйы. Жоба жетекшілері «Триатлон паркін бірге құрамыз» акциясын жариялады. Мұнда кез келген адам ағаш отырғыза алады. Аумақты көгалдандыру үшін қарағай, қайың, жөке, шаған ағаштары таңдалды.
Триатлон паркінің құрылысы жалғасуда. Алдағы уақытта баскетбол, теннис, шахмат және басқа да спорт түрлері бойынша жаңа спорт алаңдарын жабдықтау жоспарлануда. Болашақта мұнда триатлоннан әлемдік деңгейдегі жарыстар өткізу жоспарланған. Нысан тапсырылғаннан кейін Мәдениет, демалыс саябақтары және гүлзарлар басқармасының балансына беріледі. Мұнда футбол, тренажер және street workout алаңдары жабдықталған. Көлдің айналасында жүгіруге жағдай жасалған, велосипед жолдары салынды.
– Акцияның мақсаты – өңірді көгалдандыру ғана емес, сонымен қатар тұрғындардың табиғатқа қамқорлығын арттыру. Біз әрбір ағашты, әрбір бұтаны бағалауымыз керек. Экологиялық сенбілікке үш мыңға жуық адам қатысты, – деді Қарағанды облысының Табиғи ресурстар және табиғатты пайдалануды реттеу басқармасының басшысы Руслан Төлепбаев.
Бұл акция Қарағанды саябақтары мен гүлзарларында, облыстың басқа қалалары мен аудандарында да өтті.
Ләззат ҚОЖАХМЕТОВА,
Қарағанды облысы