– Ауыл шаруашылығы министрлігі 7 қазанда облыс әкімдіктеріне құс тұмауынан өлген құстардың орташа нарықтық құнын өтеу үшін құжаттар пакетін қалыптастыру мақсатында ауылдықтарға, жеке қосалқы шаруашылық иелеріне көмек көрсету қажет екенін ескертіп, хат жолдады. 11 қазанда 2 мың 585 құс бойынша құжаттар дайындалды, өтемақының жалпы сомасы 8 878 364 теңгені құрайды, – деді ол.Оның мәліметінше, құстардың өлім-жітімінің жаңа жағдайлары тек Солтүстік Қазақстан облысының жекелеген ауласында тіркелді. Басқа өңірлерде 11 қазанда үй құстарының қырылу дерегі тіркелген жоқ. Соңғы 10 күндегі динамиканы ескере отырып, Ветеринариялық бақылау және қадағалау комитетінің мамандары Қазақстанда құс тұмауынан құстардың өлімі тоқтады деген қорытындыға келіп отыр.
«Қыркүйек айының ортасынан бері жеке қосалқы шаруашылықтарда құс тұмауын жұқтыру салдарынан 25 мыңға жуық құс өлді. Сонымен қатар инфекция ошақтарынан 20 мың 177 бас құс тәркіленді. Осылайша, қазіргі уақытта барлығы 45 мың 110 бас құсқа, оның ішінде 27 мың 393 тауық, 777 күркетауық, 10 мың 141 қаз, 6 мың 799 үйрек үшін өтемақы беріледі», – деп нақтылады АШМ өкілі.Ол құс фабрикаларында да жануарлардың өлім-жітімінің толығымен тоқтағанын хабарлады. Екі кәсіпорын – «Бескөл құс фабрикасы» ЖШС және «Агроинтерптица» фабрикаларына 361 мың 647 құс үшін өтемақы төленеді. Ал Арқалық құс фабрикасында өлген құстың көбі, шамамен 256 мың тауық құс тұмауынан емес, өндірістегі желдетудің уақытша доғарылуынан тұншығып өлген делінді.
Е. ЕРДЕНОВ