Отырыс барысында депутаттар «2014 жылғы 29 мамырдағы Еуразиялық экономикалық одақ туралы шартқа өзгерістер енгізу, сондай-ақ жекелеген халықаралық шарттардың қолданысын өзгерту және тоқтату туралы хаттаманы» ратификациялайтын заңды бекітті.
– Еуразиялық экономикалық одақ Елбасымыздың бастамасымен құрылды. Оның жұмысын өркендетуге Мемлекет басшысы да баса мән беріп отыр. Еуразиялық одақ, ең алдымен экономикалық дамуды, тауар айналымын арттыруды және инвестиция саласындағы ынтымақтастықты күшейтуді көздейді. Бүгін қабылданып отырған заң жаңа кедендік баждарды белгілеу арқылы осы аталған мақсаттарды іске асыруға үлесін қосады деп сенеміз, – деді Мәулен Әшімбаев.
ЕАЭО елдері арасындағы кедендік әкелу баждарын бөлудің жаңа нормативтері туралы депутат Сергей Карплюк айтып берді. Хаттама бойынша Беларусь үшін кедендік әкелу баждарын бөлу нормативі, яғни осы елдің үлесі көбейтілген. Себебі Беларусь елінде кедендік баждарды жинау коэффициенті бөлу нормативінен көп болып шығыпты. Ал Қазақстан импорттың қазіргі көлемін сақтаған жағдайда сальдо бойынша оң көрсеткішке қол жеткізеді.
«Хаттама арқылы құзыретті органдардың кедендік әкелу баж сомаларын түсіруді және бөлуді дұрыс орындауын, олардың Еуразиялық экономикалық одаққа мүше мемлекеттердің бюджет кірісіне аударуын бақылау тәртібі туралы ереже және ақпарат алмасу мәселелері анықталады», – деді Сергей Карплюк.
Осының алдында заң жобасы бойынша түсініктеме берген Ұлттық экономика министрі Руслан Дәленовтің айтуынша, хаттамада кедендік әкелу баждарының сомаларын бөлудің жаңа нормативтері бекітіледі. Нормативтердің мөлшері одаққа мүше 5 мемлекеттің әрқайсысы үшін айқындалған. Бұл ретте, Қазақстанға арналған норматив 6,955%-ға тең.
Сонымен қатар отырыста сенаторлар бірқатар депутаттық сауал жолдады. Сенат вице-спикері А.Шәкіров пен депутат Л.Сүлеймен тұрғын үй саясатын іске асырудағы проблемаларды көтерді. Е.Мамытбековтің сауалында өнеркәсіп саясатына, оның ішінде «Өнеркәсіп саясаты туралы» заң жобасын әзірлеуге қатысты мәселе қозғалды. Өз кезегінде сенатор О.Булавкина шекара маңындағы ауылдардағы жағдайға назар аударды.
Елдос СЕНБАЙ
