– Бюджетті қарау барысында біз оның Тұңғыш Президент, Елбасы, «Nur Otan» партиясының Көшбасшысы Нұрсұлтан Әбішұлы Назарбаевтың және Мемлекет басшысы Қасым-Жомарт Тоқаевтың алға қойған міндеттерін толық көлемде шешілуіне қол жеткізуіміз керек. Бұл ретте, біз коронавирус пандемиясы салдарынан әлемдік экономикада қалыптасқан қазіргі күрделі жағдайды негізге алуға тиіспіз. Үшжылдық бюджет дәл осы жағдайларды ескере отырып қалыптастырылуы тиіс, – деп атап өтті Нұрлан Нығматулин.Зерттеулер мен консалтингтік қызметтердің бір бөлігі шын мәнінде қажет екенімен келісе отырып, Мәжіліс Төрағасы қазіргі заманғы байланыс құралдары, атап айтқанда бейнеконференция форматы көптеген іс-шараны, соның ішінде халықаралық іс-шараларды көп шығынсыз тиімді өткізуге мүмкіндік беретініне тоқталды.
– Семинарлар мен симпозиумдарды және басқа да іс-шараларды өткізуді қалыптасқан жағдай тұрақтанғанға дейін шегеруге болады. Қаражаттарды неғұрлым маңызды әлеуметтік жобаларға бөлуді қарастыру қажет, – деді Нұрлан Нығматулин.Депутаттар Мемлекет басшысының тапсырмасын орындауға үш жыл ішінде ауылды фельдшерлік-акушерлік пункттер мен дәрігерлік амбулаториялармен қамтамасыз ету мәселесін көтерді. Депутаттардың алаңдаушылығын Үкімет әлі күнге дейін осындай медициналық пункттерге өңірлердің нақты қажеттіліктері туралы деректердің жоқтығынан туындатып отыр. Осыған байланысты қарастырылып отырған үшжылдық бюджетте осындай тармақтарды құру үшін нақты қаржылық ұсыныстар жоқ. Мәжіліс Спикері ауылдарда жаңа фельдшерлік-акушерлік пункттер салуды жеделдету қажеттігін атап өтіп, бұл мақсаттарға қаражат көзделуі тиіс екенін айтты. Нұрлан Нығматулиннің пікірінше, Квазимемлекеттік сектормен игерілмеген және қазынашылық шоттарда жатқан қаражаттың бір бөлігін осы бағытқа қайта бөлуге болады
Сонымен қатар Мәжілістегі «Nur Otan» фракциясының отырысында бюджет жобасын талқылау барысында депутаттар ауылды сумен қамтамасыз ету жобаларын қаржыландыру үшін де шығыстарды ұлғайтуды ұсынды. Мәжіліс Спикері «ауылдарды ауызсумен қамтамасыз ету бюджет басымдықтарының бірі болуға тиіс», – дейді.
Г. БЕКЗАТ