Бақытжан ЕРТАЕВ, Мәжіліс депутаты: Nur Otan фракциясының мүшесі:
Партия жұмысын жандандыруды тапсырды
– Елбасы төрағалығымен Үкімет, Nur Otan партиясы және Парламент Мәжілісіндегі партия фракциясының мүшелері бас қосып, бірқатар келелі мәселені талқылады. Жиында Үкімет Nur Otan партиясының сайлауалды бағдарламасының іске асырылуы бойынша есеп берді.
Өз кезегінде Елбасы Нұрсұлтан Әбішұлы Парламенттегі партия фракциясына «Қазақстан 2021: Бірлік. Тұрақтылық. Жасампаздық» атты сайлауалды бағдарламасы шеңберінде бірқатар міндет жүктеп, елдің дамуы мен халықтың әл-ауқатын арттырудағы партияның айрықша рөлін атап өтті.
Өңірлерді дамыту бағдарламаларының жүзеге асырылу барысын, фракция жұмысында бюрократияны және үйлестірудің күрделі процедураларын жою қажеттігін, партияның саяси көшбасшылығын сақтап қалудың маңыздылығы да жиын барысында сөз болды. Сондай-ақ Елбасы Nur Оtаn партиясының Парламент Мәжілісі мен мәслихаттардағы фракциясының жұмысына баға беріп, Nur Оtаn партиясының рейтингі барлық деңгейдегі депутаттардың атқарған жұмыстарының нәтижесінде қалыптасатынын жеткізді. Жиын соңында депутаттардың өңірлерге жұмыс сапарларының форматын қайта қарауды және партияның қоғамдық қабылдау бөлмелерінде бірінші басшылар мен азаматтардың кездесуін жоғары деңгейде ұйымдастыруды, партия органдарының – Партиялық бақылау комитеті мен Сыбайлас жемқорлыққа қарсы іс-әрекет жөніндегі республикалық қоғамдық кеңестің жұмысын жандандыруды тапсырды.
Зәуреш АМАНЖОЛОВА, Мәжіліс депутаты, Nur Otan фракциясының мүшесі:
Ашылмай жатып, жабылған зауыттарды сынағаны орынды
— Елбасы Н.Назарбаевтың Nur Otan партиясының жиынында көтерген мәселелері өте орынды. Партияның жұмысын қайта жандандыруды қатаң қадағалап отыр. «Халықтың уәжін естіп қана қоймай, мұң-мұқтажын тыңдайтын мемлекет болуымыз керек» деп тапсырма берген болатын. Соған орай, халықпен етене жақын жұмыс істей білуі маңызды екенін баса айтты. Әсіресе, депутаттардың аймақтарды аралағанда, аудан, облыс орталықтарымен қатар, шалғай жатқан елді мекендерді түгел қамтуы керек екенін айтты. Халықпен жүздесуде ел ішіндегі мәселелерді ашық талқылау керегіне баса мән беруге шақырды.
Сондай-ақ жиында кейінгі кездері атаулы әлеуметтік көмекті заңсыз жолмен алғандардың қарасы көп екенін, жергілікті жерлерде жәрдемақыны төлеу жүйелі жүргізілмегенін сынға алды. Тұрмысы жоғары отбасылар да табысын жасырып, атаулы әлеуметтік көмек алып келген жағдайлар жиі кездеседі. Елбасы елдің тұрмысын түзеуге бағытталған бастама, жобалардың өз деңгейінде жүзеге асуына белсенді атсалысу керегіне басымдық беріп отыр. Алдағы уақытта халық арасында шешімін таппаған мәселелер оңтайлы шешіледі. Сол кезде мемлекет тарапынан беріліп жатқан көмек тиесілі азаматтарға қолжетімді екеніне көпшіліктің көзі жетеді.Елбасы айтқан тағы бір мәселе — халықты тұрақты жұмыспен қамту. Ол үшін отандық өндірісті дамыту ең маңызды фактор екені ақиқат. Кезінде телекөпір арқылы іске қосылған зауыттардың көпшілігі бүгінде өнім шығармастан, жабылып қалған. Телеарналар арқылы халықтың көз алдында ашылған зауыттардың, шын мәнінде, жұмыс істемейтіні халықтың наразылығын тудырады. «Ашылды» деген ақпарат тараса да, іс жүзінде жұмыс істемей жабылып қалған зауыттардың жұмысын сынға алғаны орынды. Себебі ел экономикасын дамытудың кілті — халықты тұрақты жұмыспен қамту, өндірісті дамыту, отандық өнім көлемін арттыру. Сондықтан Елбасы айтқан сыннан нәтиже шығарған абзал. Халықтың тұрмысын жақсартуға бағытталған жұмыстар алдағы уақытта жүйелі жалғасын табады.
Майра АЙСИНА, Мәжіліс депутаты, Nur Otan фракциясының мүшесі:
Халықтан жасырынып, қашудың қажеті жоқ
— Елбасының халықпен тығыз жұмыс істеу мәселесін көтеріп отырғаны өте орынды. Ел аралағанда шалғай ауылдың тұрғындарымен жиі кездесемін. Шындығында, халыққа мәселенің мәнісін түсіндірсең, тыңдайды. Ұсыныстарын айтады. Өзіне қажетті ақпаратты, құқығын қорғайтын заңдардың артықшылығынан хабардар болғанына ризашылығын білдіреді. Сондықтан депутаттар халықпен ашық жұмыс істеуі керек. Бүгінгі таңда ел проблемасын әлеуметтік желі арқылы басқарушы орындарға жеткізіп жатады. Оның себебі мұң-мұқтажын айтып барған мекемелердің олардың өтінішіне немқұрайды қарайтыны, уақытылы жауап бермейтіні ішінара кездесіп жатады. Түсінбестік туындайды. Проблема қордаланып, жинала берген соң, шешімін табуы да қиындай түседі. Сондықтан әрбір өтініш, ұсыныс жерде қалмауы керек. Өйткені халықтан қашудың қажеті жоқ. Тұрмысын түзеу, құқығын қорғау мәселесіне қатысты сауалдарына нақты жауап алған кезде ел де жергілікті басқарушы органдардың жұмысына оң баға беретін болады.
Жиында Елбасы сынға алған салалардың жұмысын жандандыруға бәріміз атсалысқанымыз жөн. «Сын түзелмей, мін түзелмейтінін» ұдайы қаперде ұстауымыз қажет.
Соңғы кездері қоғамда қызу талқыланған атаулы әлеуметтік көмек беру, міндетті медициналық сақтандыру мәселелері жергілікті атқарушы органдардың шынайы жұмысын көрсетті. Сол себепті кез келген бастама, жаңа жобаларды түсіндіру, іске асыруға атсалысу — депутаттардың міндеті.
Елдің көкейтесті мәселесі ашық талқыланған кезде уақытылы шешімін табады. Елбасы айтқан сыннан нәтиже шығуы тиіс.