Түркістан облысы әкімі баспасөз қызметінің мәліметінше, облыс басшысының тапсырмасымен Созақ ауданында төрт түліктің төресі түйені көбейту қолға алынған. Атап айтқанда, ойсыл қара тұқымын көбейту арқылы өзге өңірлермен бәсекелес болуға қауқарлы ауданға осы кәсіпті мықтап қолға алуды тапсырған болатын. Осы мақсатта түйе түлігін асылдандыруға 2 000-ға жуық түйе аналығы сатып алынды. Оның жартысы жеңілдетілген несие алу арқылы, қалғаны азаматтардың өз қаражаты есебінен жүзеге асырылған. Аймақ басшысы Өмірзақ Шөкеев ауданға арнайы жұмыс сапары барысында түйе шаруашылығымен айналысатын бірқатар шаруа қожалығының жай-күйімен танысты.
Созақ ауданында түйе шаруашылығының әлеуеті жоғары. Мәселен, өңір басшысы аялдаған Шолаққорған ауылында түйе шаруашылығын өркендетіп отырған «Бағдат» шаруа қожалығында 350 бас түйе бар. Шөлге шыдамды түліктің көктем айларында 256 тонна сүті Golden Саmеl Group LTD ЖШС зауытына өткізілген.
Ірі мал басын асылдандырумен айналысатын «Қанжарбек» шаруа қожалығында 110 бас мүйізді ірі қара, 1 150 бас уақ мал мен жүзге жуық жылқы бар. Мал шаруашылығын дамытуда Созақ ауданы межелі табыстарға қол жеткізуде. Атап айтқанда, ауданда 40 мыңға жуық мүйізді ірі қара, 341 471 бас қой-ешкі малы мен 14 мыңға жуық түйе, 25 мыңнан астам құс өсірілуде. 2020 жылдың 8 айында 7 546,1 тонна ет, 11 321,6 тонна сүт, 2 129,7 мың дана жұмыртқа өндіріліп, былтырғы жылдың осы кезеңімен салыстырғанда ауыл шаруашылығы өнімдерін өндіру көлемі едәуір өскені байқалады.
Өмірзақ Естайұлының тапсырмасымен Түркістан облысында түйе шаруашылығын дамытудың 2020-2022 жылдарға арналған кешенді іс-шара жоспары жасалды. Жоспарға сәйкес, Арыс, Кентау қалалары мен Отырар, Ордабасы, Созақ, Шардара аудандарында биылға қосымша 3 962 інген сатып алынып, соның нәтижесінде өндірілетін сүттің көлемін 14 250 тоннаға, яғни 15%-ға арттыру жоспарланған.
Өмірзақ Естайұлы сондай-ақ Созаққа барған іссапары барысында халықты газ, жарық пен жылумен қамтамасыз етуге бағытталған жобалармен танысты.
Таукент кентінде орналасқан «Уран Қуат» ЖШС-і жылу маусымына дайын. Таукент және Қыземшек кентін жылумен қамтамасыз ететін орталық 4 мекеме, 39 көпқабатты тұрғын үйлер мен 180 жеке үйлерді, 9 бюджеттік мекемені мазут отынымен жылытып отыр. 279 адам тұрақты жұмыспен қамтылған.
Облыс әкімі Шолаққорған ауылындағы АГТС магистральды газ құбыры-тармағын салу» жобасының жұмысымен танысты. Газ құбырының ұзындығы – 43,809 шақырым. Созақ ауданын табиғи газбен қамтамасыз ету мақсатында қолға алынған жоба республикалық және облыстық бюджеттен қаржыландырылады.
Созақ ауданындағы тағы бір ауқымды инвестициялық жоба Шолаққорған ауылында орналасқан «ЮКСЭС-50» ЖШС күн электростансасы іске қосылды. Күннен қуаттанатын стансаға аудандағы индустриалды аймақтан 120 га жер берілген. Қауіпсіз энергия көздерін дамытуға бағытталған үлкен жоба аясында жүзеге асқан жаңа стансада заманауи үлгідегі құрал-жабдықтар қойылған.
Жоба құны 24 млрд теңгені құрады. Өндірістік қуаты 50 мВТ 30 тұрақты жұмыс орны ашылған.
Облыс әкімі Өмірзақ Шөкеев Созақ ауданына жасаған жұмыс сапарында Жастар ресурстық орталығының жаңа ғимаратының ашылу салтанатына қатысты. Заманауи жабдықтармен қамтамасыз етілген ғимарат соңғы үлгіде салынған. Облыс басшысы жаңа орталықтың ашылу салтанатына орай шаңырақ көтерген жас жұбайларға салтанатты түрде неке куәлігін табыс етті.
Тельман БЕЙСЕН,
Түркістан облысы
