Альберт РАУ, Мәжіліс депутаты, Nur Otan партиясы фракциясының мүшесі:
Бәрі өзгеріп жатыр
– Елбасы Нұрсұлтан Назарбаевтың төрағалығымен Nur Otan партиясы фракциясының мүшелері, басшылары бас қосты. Осы Мәжіліс партияның қайта түлеу кезеңіне жаңаша күш беретіні сөзсіз. Басталып жатқан жүйелі өзгерістер көбі күткендей ғарыштық сипатқа ие болмады. Елбасы да мұны атап өтті. Біз нақты жүйе бойынша бұрыннан бері бірқалыпты түрде алға жылжып келеміз. Фракция және Үкімет мүшелері алдында сөйлеген сөзінде Елбасы Үкімет жүзеге асырып отырған бағдарламаларға, партия платформасына тоқталды. Негізі Үкімет партия құрады, сосын бағдарламалар бюджетте жүзеге асырылады.
Мәжілісте партия Төрағасының Бірінші орынбасары Бауыржан Байбек айтып өткендей, қазір бәрі тез өзгеріп жатыр. Көптеген Еуропа елдерінде центристік немесе консервативті партия жоқ. Адамдардың талғамы да өзгерген. Мысалы, бұрын адамдар түгел отбасымен, үрім-бұтағымен бір партияға дауыс беретін.
Ал қазір бәрі өзгеріп жатыр. Саясаттың мәні де осында: барлық ішкі және сыртқы өзгерістерді сезіну және оған жауап қайтару. Сондықтан қазір маңызды қайта түлеу кезеңі орын алып жатыр. Бәрі оңынан болады деген сенімдеміз.
Ерлан САИРОВ, cаясаттанушы:
Жұмыс форматын жаңалау керек
– Ең негізгі мәселе – Nur Оtаn партиясының Парламент Мәжілісі мен мәслихаттардағы фракциясы мемлекеттік органдарда қоғамның, халықтың мүдделерін қарастыруда өзінің жұмысын жоғары деңгейде жүргізіп отыруы қажет. Депутаттарды тек қана заң шығарушы емес, халықтың мүддесін қорғайтын, халықтың ойын билікке жеткізіп отыратын белгілі бір буын деп қарастырғанымыз жөн. Аудандық, облыстық жерлерде Nur Otan партиясының депутаттары халықпен тығыз жұмыс істей отырып, жергілікті жерлердегі әлеуметтік, рухани мәселелерді шешуде өзінің рөлін арттыруы керек. Бұл – бүгінгі заман талабы.
Мәжіліс жұмыс форматын өзгерту өте маңызды. Яғни, әлеуметтік сала, білім саласы, мәдениет саласымен бірге экономикалық процестердің барлығына депутаттар әрбір министрлікпен жұмыс істей отырып, сол жердегі бюджеттің бөлінуін немесе басқа бір бағыттарға жіберілуін жіті қадағалап, оған бақылау жасауды қолға алса дейміз. Бұл жұмыстар сөзсіз депутаттардың халық арасындағы беделін өсіреді.
Алда келе жатқан электоралдық цикл аясында Nur Otan партиясының атқаратын жұмысының әдістері мен тәсілдерін жетілдіріп, тетіктерін арттырудың нақты бағыттары керек. Мәселен, Nur Otan партиясы халықтың әлеуметтік-рухани ең негізгі қажеттіліктерін өтеудің белгілі бір алгоритмін жасаса. Қорыта айтқанда, осындай жиналыстар халықтың мүддесін шешудің және алгоритмін жасаудың негізі бола алады.
Серік БЕЙСЕМБАЕВ, әлеуметтанушы:
Тиімді жұмыс – нәтиже кепілі
– Жиында Nur Otan партиясы фракциясының беделін арттыру мәселесі сөз болды. Оған қатысты бірқатар сыни пікірлер айтылды. Оның ішіндегі маңыздысы – депутаттардың қоғамдық мәселелерді көтеруде белсенді болмауы. Яғни, қандай да бір даулы мәселелер туындап жатқан кезде фракцияның депутаттары бұл қоғамдық дискуссиядан тысқары қалып отырады. Ал негізінде халық Nur Otan партиясының, депутаттардың мейлінше мәселені талқылауға атсалысуын, өзінің позициясын білдіруін және партия ретінде қоғамдық мәселелерді шешуге үлес қосуын күтеді. Өкінішке қарай, бұл бағытта аса бір белсенділік көріп отырған жоқпыз. Соған қатысты сын айтылды.
Екінші айтылған мәселе – депутаттардың, Үкімет мүшелерінің, оның ішінде министрлердің жұмысын бақылауды күшейту мәселесі. 2017 жылғы Конституциялық реформаға сәйкес, Парламент депутаттарының құзыреті кеңейтілген болатын. Яғни, бұрынғыдай осы реформаға сәйкес депутаттар министрден есеп алуға және қажет болған жағдайда оларды орнынан алу туралы ұсыныс жасауға құзыреті бар. Бірақ бұған қатысты да осы уақытқа дейін Парламент депутаттары өздерін таныта алған жоқ. Осыған байланысты жұмыстарды жүргізу қажеттілігі жөнінде Елбасы – Nur Otan партиясының Төрағасы Н.Назарбаев ұсыныстарын айтып, бірқатар тапсырма берді.
Алда болатын Парламент сайлауына қатысты партияның осы бағыттарда жұмыс істейтіні анық. Қаншалықты тиімді жұмыс істей алады, оң нәтижелерге қол жеткізе алады. Оны уақыт көрсетеді. Алдағы уақытта менің ойымша, Парламенттегі Nur Otan партиясының депутаттарының жұмысына жаңа леп келетін сияқты. Яғни, депутаттардың қоғамдық белсенділігін арттыру, қоғамдық мәселелерді шешуге қатыстыру мақсатында бірнеше сұрақтар әлі де туындайды. Соған қатысты бірнеше маңызды қадамдар орын алуы мүмкін.