Аймақ гүлденсе, ел дамиды. Әр өңірдің даму жоспары талапқа сай дайындалса, «Ұлт жоспарының» жүзеге асқаны. Осыған орай, Елбасы 2020 жылдың 1 наурызына дейін әр аудан мен қала, облыс үшін даму бағдарламасын әзірлеуді тапсырды.
Nur Оtаn партиясы фракциясының мүшелері қатысқан кеңесте Елбасы түрлі өзекті мәселе көтеріп, басым бағытты анықтады. Жиында «Қазақстан – 2021: Бірлік. Тұрақтылық. Жасампаздық» сайлауалды бағдарламасының орындалу барысы мен «100 нақты қадам» Ұлт жоспары бағдарламасы қаралды. Ел үшін өзекті болып отырған бағдарламалардың осы кезеңге дейінгі нәтижесіне баға берілді. Кем-кетігі ескеріліп, жобаның алдағы кезеңіне жоспар құрылды. Шығын мен кіріс есептеліп, мақсат пен міндет айқындалды.
«Тапсырмаларды сапалы орындау және нақты нәтижеге қол жеткізу үшін екпінді іс-қимылдардан тұратын жол картасы әзірленді. Партияның парламенттік фракциясымен үйлесімді жұмысының арқасында сайлауалды бағдарламасындағы барлық міндет-мақсаттарға өз уақытында қол жеткізуге мүмкіндік жасалды. Осы ретте фракциямен бірлесіп жүзеге асырылып жатқан шаралар Nur Otan партиясының халық алдындағы сайлауалды міндеттемелерін толығымен орындап, қоғамда тиімді шешім қабылдайтын нақты іс пен халық бірлігі партиясы ретіндегі беделін күшейтуге үлес қосуда. Партияның сайлауалды бағдарламасы бойынша іс-шаралар жоспары іске асырылып жатыр. Тұғырнаманың барлық бағыттары ең көкейкесті мәселелерді шешуді қамтиды» деді баяндамасында А.Мамин.
Сондай-ақ Үкімет басшысы партияның сайлауалды бағдарламасы бойынша 112 іс-шара жоспары жүзеге асырылып жатқанын айтты. Оның ішінде бүгінгі күні 31-і орындалса, 81 шара кезек күтіп тұр. Оған қоса мемлекет барлық әлеуметтік міндеттемелерді толық көлемде орындайтынын алға тартты. Атаулы әлеуметтік көмектің жаңа форматы әзірленіп жатқанын баяндады. 2020 жылдан бастап Міндетті әлеуметтік медициналық сақтандыру енгізетінін жеткізді.
Премьер-министрдің бірінші орынбасары және Қаржы министрі Әлихан Смайылов баяндамасын белсенді халықтың 30%-дан астамы шағын және орта бизнесте жұмыс істейтінінен бастады. Соңғы 5 жылда шағын және орта бизнес субъектілерінің саны 1,5 есеге өсіп, 1,3 миллионнан асқанын мәлімдеді. Дүниежүзілік банктің Doing Business рейтингінде Қазақстан Франция (32), Жапония (39), Түркия (43) сияқты Экономикалық ынтымақтастық және даму ұйымы елдерінен озып, әлемдегі 190 елдің ішінде 28-орынға көтерілгенін қуана жеткізді. ОЭСР стандарттарына сәйкес бәсекелестікті дамыту бойынша жұмыстар атқарылып жатқанын қосты.
– Шағын және орта бизнесті қолдаудың ең тиімді құралы ретінде «Бизнестің жол картасы – 2020» бағдарламасы іске асырылуда. Осы бағдарламаны іске асыру жылдары 14 мыңнан астам жобаға 2,5 трлн теңге сомасындағы кредиттерге 241 млрд теңге субсидия бөлінді. 6 мың жоба бойынша 230 млрд теңге сомасындағы кредиттерге кепілдік берілді. Жаңа бизнес-идеяларға 3 млн теңгеге дейін мемлекеттік грант беріледі. Атап айтқанда, 2,5 мыңнан астам жоба бойынша 5,7 млрд теңгеге грант бөлінді. Кәсіпкерлікке үйрету үшін 200 мың адам оқытылды. Бағдарламаға қатысушылар 95 мың жаңа жұмыс орнын құрып, 19 трлн теңгеге өнім өндірді және 1,2 трлн теңгеден астам салық төледі. Жалпы бағдарлама бойынша, 1 теңге субсидия қатысушыларға 100 теңге түсім және бюджетке 6 теңге салық әкеледі. Осы бағдарламаның жоғары тиімділігін ескере отырып, оның мерзімі 2025 жылға дейін ұзартылады. Бағдарламаны іске асыру үшін алдағы 3 жылда мемлекеттік бюджеттен 270 млрд теңге бөлінеді, – деді Ә.Смайылов.
Премьер-Министрдің орынбасары Б.Сапарбаев Nur Otan партиясының сайлауалды бағдарламасындағы әлеуметтік салаға қатысты ой білдірді. Бағдарлама халықтың жағдайын жақсарту, еңбек етумен байланысты екенін айта келе, тапсырмалардың рет-ретімен орындалып жатқанын айтты. «100 нақты қадам» Ұлт жоспары қадам-қадамымен іске асып жатқанын жеткізді. Сондай-ақ азаматтардың ахуалын жақсарту үшін ең қажеттісі жұмыспен қамту екенін алға тартты. Өңірлерді аралап, халықпен кездескенде табыс табу, жастарды қолдау, әлеуметтік көмекке тең жағдай жасау мәселесі азаматтарды көп толғандыратынын айтты.
Nur Otan партиясының сайлауалды бағдарламасында әлеуметтік салаға қатысты 31 шара қарастырылған. Аталған шараның 17-і орындалды, 14-і орындалу үстінде. «100 нақты қадам» Ұлт жоспарының 78-қадамы – ЖОО-ның академиялық және басқару тәуелсіздігін арттыру бойынша бақылау күшейтілді. Жыл соңына дейін 2 ЖОО біріктіріліп, 5 оқу орнының лицензиясын алу мәселесі қарастырылады» деді Б.Сапарбаев.
Ал Үкімет басшысының орынбасары Роман Скляр баяндамасында партияның сайлауалды бағдарламасы және Елбасы тапсырмалары бойынша Көлік инфрақұрылымын дамыту жайын айтты. 2015-2019 жылдарға арналған «Нұрлы жол» мемлекеттік бағдарламасы мен басқа да өзекті мәселенің басын қайырды. Алдағы 3 жыл ішінде Нұр-Сұлтан, Алматы мен Шымкент қаласында жұмыс істейтін жастарға 3 мыңға жуық жалдамалы пәтер берілетінін айтты. Өткен жылдан бастап сапалы ауызсумен қамтамасыз ету үшін қаржыландыру 100 млрд теңгеге дейін ұлғайғанын мәлімдеді.
«2,4 мың шақырым республикалық маңызы бар автомобиль жолдары салынды және қайта құрылды. 1,3 мың шақырым жаңа теміржол пайдалануға берілді. Қытаймен шекаралас терминал инфрақұрылымының өткізу қабілеті жылына 40 млн тоннаға дейін ұлғайтылды. Ақтау портының кеңеюіне және Құрық портының құрылысына байланысты Каспийдегі порт инфрақұрылымының өткізу қабілеті жылына 27 млн тоннаға дейін ұлғайтылды. Нұр-Сұлтан қаласында жаңа теміржол вокзалы және жаңа әуежай терминалы салынды. 15 әуежайда ұшу-қону жолағында қайта құру аяқталды», – деді Р.Скляр.
Елбасы көтерген мәселелер шешімін тапса, партия мен ел игілігіне жарайды. Жоғарыда құрылған жоспар мен нәтиже партияның нақты бағытын айқындайды. Сайлауалды бағдарлама мен Ұлт жоспары біріккенде жүйе толыққанды жүзеге асады.