Қала әкімі М.Әйтенов мұны әлі күнге дейін үшінші мегаполис тұрғындарын ауыл шаруашылығы өнімдерімен толық қамти алмай отыруымыздың бірден-бір себебі деп түсіндіріп, аудан басшысына ескерту жасады. – Әрбір шағынаудан мен тұрғын алаптың мүмкіндіктерін зерделей отырып, оған барлық елді мекенді жұмылдырып ауыл шаруашылығын дамытудың нақты жүйесін жасау керек. Сонымен қатар мал бордақылау орындарына ерекше көңіл бөлінсін. Санитарлық талаптардың қатаң сақталуы бақылауға алынсын, – деді қала әкімі Мұрат Әйтенов 9 айдың қорытындысы бойынша есеп берген Абай ауданының әкімі Бұхарбай Пармановқа.
Есеп беру жиынында Абай ауданында тұрғын үй құрылысының бәсеңдегені де сөз болды. «Ауданға инвестор тартып, оларға қолайлы жағдай жасау аудан әкімдігі мен тұрғын үй басқармасы басшысының міндеті. Апатты жағдайдағы үйлерді саралап, көпқабатты үйлердің қасбеттерін ретке келтіру де кезек күттірмейтін мәселе», – деді тағы да қала басшысы. Шаһар басшысы дебиторлық қарыздар жөнінде де ескерту жасады. «Қарыздар жылу маусымы басталмай тұрып өндірілуі керек. Бұл мәселені шешу үшін жақын арада ұсыныс дайындаңыздар» деп қатаң ескертті.Инфрақұрылым кезең-кезеңімен шешіліп жатыр
Десек те, биыл жыл басынан бергі 9 айда Абай ауданында ауыз толтырып айтарлықтай атқарылған жұмыс көп. Мәселен, биыл осынау ауданда көпқабатты 222 тұрғын үйдің ауласы абаттандырылып, балаларға арналған 58 спорт алаңшасы орнатылған. Аудандағы 453 көпқабатты тұрғын үй 258 аулаға біріктірілген. Одан бөлек, алдағы күндері 36 көпқабатты тұрғын үйдің ауласы абаттандырылып, жаңадан 42 спорт алаңшасы салынбақ. Сондай-ақ тозығы жеткен 18 спорт алаңшасына ағымдағы жөндеу жұмыстары жүргізілмекші. Айта кетейік, есепті жиында Абай ауданындағы жаңадан қосылған 10 елді мекеннің инфрақұрылымдық мәселелерін шешу бағытында тиісті жұмыстар атқарылып, кезең-кезеңімен шешіліп келе жатқаны да аталып өтті. Бұл мәселеде аудан әкімі тұрғындармен жиі бас қосып тұрады екен. Б.Пармановтың айтуынша, ауданның 24 елді мекені, яғни 71 пайыз тұрғыны сапалы ауызсумен қамтылып отыр. «Жыл басында 2 елді мекенге сапалы ауызсу жеткізілген еді. 2020 жылы сапалы ауызсумен қамтамасыз ету жұмыстарына жалпы 8,4 млрд теңге қаржы қаралды. Жыл соңына дейін 4 елді мекеннің ауыз су жүйесінің құрылыс жұмыстары аяқталып, 18 мыңға жуық тұрғын таза су ішетін болады», – деді ол. Қазіргі таңда аудан аумағы бойынша 25 елді мекен мемлекеттік электр жарығымен қамтылып отырса, қалған 9 елді мекен жекеменшік электр трансформаторларын пайдаланады. Биыл 1 елді мекенді электр қуатымен қамтамасыз ету жұмыстарына – 224 млн, 7 елді мекеннің жобалық-сметалық құнын дайындауға – 118,3 млн теңге бөлініпті. Сонымен қатар аудан тұрғындарының 74 пайызы табиғи газ жүйесімен қамтылса, қалған 9 елді мекен қатты отынды пайдаланады. Биыл табиғи газбен қамтамасыз ету жұмыстарына 175,2 млн теңге бөлінген. Аталған қаржы кейбір елді мекендерге газ тарту шараларына жұмсалса, бірқатары жобалық-сметалық құжаттар мен жоба дайындау шараларына бағытталады.Ирригацияда қарқын бар
Сондай-ақ аудан аумағында жалпы 195,3 шақырымға ирригация жүйелері орнатылған. 7 мекенжайда суағар (лоток) жүйелерін орнату жұмыстары аяқталған. Аудан аумағында жалпы орнатуды қажет ететін тағы да 37,5 шақырым ирригация жүйелері бар. Келер жылы 14 шақырымды құрайтын 21 көше мен аулаға ирригация жүйелерін орнату үшін қалалық энергетика және коммуналдық шаруашылық басқармасына ұсыныс жолданған. Бүгінгі таңда Самал-1, 2, 3 шағынауданында 270 млн теңге болатын кәріз жүйелерінің құрылысы жүргізілуде. Айта кетейік, Шымкент қаласының Абай ауданында биыл жол-құрылыс жұмыстары да кестеге сай жүргізілді. Аудан әкімінің айтуынша, жалпы жоба құны 17,7 млрд теңгені құрайтын 99 көшеге 8,2 млрд теңге қаржы бөлініп, асфальт жол салу жұмыстары атқарылуда. Атап айтқанда, 30 көшеде орташа жөндеу жұмыстары жүріп жатса, шалғай елді мекендегі 20 көше мен ішкі орамдық 29 көшеде құрылыс жұмыстары қолға алынған.
Сонымен қатар аудан аумағында жалпы 89,6 шақырым аяқжол болса, биыл тағы да қосымша әлеуметтік нысандарға баратын орталық 5 көшеге, яғни 8,1 шақырымға аяқжол салыныпты. Ауданда 71,2 шақырымдық 146 көше шағал тас төсеуді қажет етеді. 2020 жылы бюджеттен 100 млн теңге бөлініп, топырағы шығып жатқан 49 көшенің 26,7 шақырымына шағал тас төсеу жұмыстары толығымен орындалған. Енді келер жылға қосымша 44,5 шақырым шағал тас төселмек.
Абай ауданы аумағындағы 125,8 шақырымдық 55 көше жарықтандырылған. 2020 жылға әлеуметтік нысандар орналасқан 13 көшені жарықтандыру үшін 342,3 млн теңге қаржы бөлінген. Келешекте аудан аумағындағы елді мекендер мен шағынаудандағы 153 көшені жарықтандыру қажеттігі байқалады. Оның 75-інің жұмысын атқаруға қалалық энергетика және коммуналдық шаруашылық басқармасына ұсыныс жолданып, мемлекеттік-жекешелік әріптестік аясында құрылыс жұмыстарын жүргізу жоспарланып жатыр.
Салық түсімі бірнеше есе көбейген
Биыл Абай ауданының инфрақұрылымына және ауданның кәсіпкерлік бағытын дамытуға 29,3 млрд теңге көлемінде инвестиция тартылыпты. Аудандағы бюджеттік қаржының көлемі – 25,2 млрд теңгені құраса, жеке инвестиция 4,1 млрд теңгені құраған. Ал 2021 жылға 12 млрд теңгеге жеке инвестиция тарту жоспарлануда. Сондай-ақ аудан әкімі есепті жиында ауданда 17 мыңнан аса салық төлеуші бар екенін мәлімдеді. Биыл карантин жағдайына қарамастан салық төлеушілер былтырғыдан 3,2 млрд теңгеге артық орындаған. Республикалық маңызға ие болған Шымкент қаласындағы жеке тұлғалардың мүлік, жер салықтары есебінен түсім бірнеше есе артқан. Аталған салық түрлері 138 млн теңгеге көбейген. Тұрғын үй-коммуналдық шаруашылығын жаңғырту бағытында да бірқатар жұмыстардың жүзеге асып жатқанын айта кеткен жөн. Аудан аумағында орналасқан 453 көпқабатты тұрғын үйдің 111-і тозығы жеткендер санатында. Оның ішінде 2019 жылға дейін апатты деп танылған 7 көпқабатты тұрғын үйде сейсмонығайту жұмыстары жүргізілсе, одан бері тағы 4-еуі тексерілген. Келесі жылы тағы 3 көпқабатты тұрғын үйдің жағдайын зерделеу үшін тиісті басқармаға ұсыныс жолданыпты. Қазіргі таңда осынау 453 көпқабатты тұрғын үйдің 44-і жөндеуден өтсе, биылға жоспарланған 19 үйдің 12-де құрылыс жұмысы жүруде. 383 үйді жағдайына байланысты жөндеу жұмыстарын атқару бойынша тұрғындармен түсіндіру жұмыстары жүргізіліп жатыр.Интернет мәселесін тездетіп шешу жүктелді
Мұрат Дүйсенбекұлы Абай ауданы әкімінің есебін тыңдап қана қоймай, осы күні аталған аудан аумағына шығып, тұрғындармен тілдесті. Атқарылған жұмыстарды көзбен көрді. Биыл ауданға қарасты «Айкөл» тұрғын алабының халқы көптен күткен сапалы ауызсуға қол жеткізген. Ауызсуды тарту шараларын мердігер компания болып табылатын «Содби-строй» ЖШС-і атқарған. Бүгінгі таңда аумаққа электр энергиясын жүргізудің сметалық құжаттары дайындалып жатыр. Ал табиғи газ жүйесі алдағы жылы шешілмек. Дегенмен 300-ден аса тұрғыны бар елді мекеннің ендігі мәселесі интернет желісі болып тұр. «Айкөл» тұрғын алабын интернет желісімен қамтамасыз ету мақсатында әкімдік тарапынан «Мобайл телеком сервис» ЖШС-і және «Kcell» АҚ арқылы байланыс орнату жұмыстары қарастырылып, келіссөз жүргізіліп жатыр. Қала әкімі қашықтан білім алу барысында интернет мәселесінің тездетіп шешілуі қажет екенін айтып, тиісті сала басшыларына тапсырмалар жүктеді. Сонымен бірге үшінші мегаполис басшысы «Құрсай» шағынауданында құрылысы жүріп жатқан жаңа білім ошағына барды. 60 гектар аумақты алып жатқан орта мектепте 600 бала білім алмақ. Білім ордасын жеке кәсіпкер өз есебінен салып жатыр. Биыл ұлы ойшыл әл-Фарабидің 1150 жылдығына орай осынау мектепке ғұламаның есімі берілмек. «Балалардың қауіпсіз ортада білім алуы – басты міндетіміз. Бәсекелестікке төтеп берер ұрпақты өсіргіміз келсе, олардың сапалы білім алуына қолайлы жағдай жасалуы керек», – деді Мұрат Дүйсенбекұлы. Мектеп келесі жылы пайдалануға беріледі. Қала әкімі сыныптарды аралап, құрылыстың әрбір бөлігіне жіті мән берді. Оқу бөлмелерінің заманауи техникалармен қамтылуына да баса назар аудару қажетін айтып өтті. Жалпы, Абай ауданына қатысты атқарылған жұмыстар мен түйткілді мәселелерді тыңдап, көріп саралаған Мұрат Әйтенов ауданның барлық мүмкіндіктерін бағамдады, кейбір салалар бойынша бірмаша ескерту жасап, нақты тапсырма жүктеді. Президент тапсырмасына сәйкес халықпен кері байланысты күшейтуді тапсырды. iKomek арқылы мәселеге жедел ден қойып, қала тұрғындары атқарылған жұмысты көруі маңызды екенін атап өтті. Сондай-ақ ретсіз сауда орындары, жабық базар мен ондағы жануарлар саудасын тез арада ретке келтіруді тапсырды.Назгүл НАЗАРБЕК, Шымкент қаласы