Енді ешқандай азамат судьялардың шешіміне араласуға, қандай да бір үкімге не шешімге қатысты ойын тықпалауға жол берілмейді. Бұл туралы Жоғарғы соттың баспасөз хатшысы Айдос Сәдуақасов Қазақстан судьяларының VIII съезінен кейін өткен онлайн брифингте мәлімдеді. Ол сонымен қатар судьялардың жалақысы туралы ақпаратты да жайып салды.
«Бүгінгі жиында Президент судьялардың тәуелсіздігі мәселесін шегелеп айтты. Ешқандай азамат судьялардың шешіміне араласуға, қандай да бір үкімге не шешімге қатысты ойларын тықпалауға жол берілмейді. Сонымен қатар БАҚ өкілдері, журналистер, блогерлер сот шешімдері шықпай жатып әртүрлі әңгімеге еріп, сот жүйесінің тәуелсіздігіне, азаматтардың құқына нұқсан келтіретіндей жарияланымдар жариялауының алдын алу керегін және осы мәселенің соңғы уақытта өзекті болып отырғанын айтты», – деді ол Орталық коммуникациялар қызметінде өткен брифингте.Оның айтуынша, республика судьяларының съезі судьялар корпусы үшін айрықша маңызға ие. Өйткені 4 жылда бір рет өтетін жиында Судьялар қауымдастығы өздерінде туындаған мәселелерді ортаға салып, алдағы стратегиялық міндеттерін айқындайды. Жоғарғы сот өкілі сотқа іс келмеген шенеунікті не азаматты ұстаған кезде құқық қорғау органдарының судьяға қалай қысым көрсететінін айтып берді.
«Олар брифинг жариялайды. Күдіктіні халыққа бірден қылмыскер сияқты етіп көрсетеді. Алайда сот процесі барысында ол адамның ешқандай қылмыс жасамағаны немесе қылмысының дәлелденбегені анықталады. Сол кезде қоғам «Неге сіздер сол адамды босаттыңыздар?» деп соттарға шабуылдайды. Егер еш дәлел болмаса, ол адамды қалай соттаймыз? Міне, осындай фактілерді алдағы уақытта құқық қорғау органдары бірден жария етпей немесе оның анық-қанығын біліп алып қана прокуратураның рұқсатымен ғана айтса екен», – дейді.Оның айтуынша, Президент жанында сот-құқық реформалары жөнінде екі арнайы комиссия құрылған, комиссияның жұмыс тобы қандай шараларды қабылдайтыны алдағы уақытта белгілі болмақ. Ресми дерек бойынша, елімізде аудандық, облыстық және Жоғарғы сотты қоса алғанда 2 684 судья бар, қазіргі таңда 2 400 судья нақты жұмыс істейді екен.
«Судья қызметіне 14 пайыз вакансия бар. Енді олардың жалақысына тоқталайын, оның еш құпиясы жоқ. Аудандық деңгейдегі судьяның жалақысы орта есеппен 400-500 мың теңге аралығында, ал облыстық деңгейдегі судьяның жалақысы – 600-700 мың теңге, Жоғарғы соттағы судьяның жалақысы 800-900 мың теңге аралығында. Мұнда ескеретін жайт бар, әрбір судьяның еңбек өтіліне байланысты жалақысында айырмашылық болуы мүмкін», – деді ол.
Айдана БЕГІМ