Қарашада «Астана клубының» отырысы өтеді. Халықаралық пікірталас алаңының бесінші басқосуына әлемнің 50-ге жуық саясаткері және зиялылар, халықаралық қатынастар саласындағы жетекші мамандары қатысады.
Мерейтойлық бесінші отырысында «Үлкен Еуразия: жаһандық ынтымақтастықтың жаңа архитектурасы жолында» тақырыбында халықаралық саясат мәселесін қозғайды.
Іс-шараны Әлемдік экономика және саясат институты мен Қазақстанның Тұңғыш Президенті – Елбасының қоры ұйымдастырып отыр. Жиында Еуразияның стратегиялық болашағы мен қауіпсіздігінің өзекті мәселелерін бірлесіп талқылайды.
Басты мақсат – Үлкен Еуразиядағы ынтымақтастықты нығайту. Мұндай тақырыпты таңдауға соңғы 70 жыл бойы халықаралық қатынастарда тұрақтылықты қамтамасыз еткен ғаламдық институттардың күйреуі мен құлдырауы себеп болып отыр. Оның үстіне, тоқырау қазіргі кезде шегіне жеткен. Ядролық қауіпсіздік саласындағы стратегиялық келісімдердің жойылуы, дүниежүзілік экономикада протекционизмнің үдеуі, сондайақ түрлі санкция салдарының ушығуы мәселелері тығырыққа тіреп жатыр. Сонымен қатар климаттың құбылуы, экология мәселесі талқыланады.
Әлемдік экономика және саясат институтының «2020 жылғы Еуразия үшін ең үлкен 10 қатер» сараптамалық рейтингінің екінші басылымы қатысушылар мен көпшілік назарына ұсынылмақ. Тәуекелдер рейтингіне арналған былтырғы бірінші басылым үлкен сұранысқа ие болған. Сондықтан биыл жаңа басылымды дайындаған. Зерттеу еңбекке әлемнің үздік 40 сарапшысы атсалысқан.
«Астана клубының» жұмысына халықаралық деңгейде қызығушылық жоғары.
Ашылғалы бері клуб қызметіне әлемнің 40 елінен 200-ден астам сарапшы қатысты. Оның ішінде АҚШ, Қытай, Ресей, Германия, Түркия, Ұлыбритания, Франция, Жапония, Оңтүстік Корея және т.б. елдердің өкілдері бар.
«Астана клубының» бесжылдық тарихындағы танымал саясаткерлер мен сарапшылар қатарында Жозе Мануэль Баррозу, Мұхаммед әл-Барадей, Ахмет Дәуітоғлы, Вацлав Клаус, Хамид Карзай, Джордж Фридман, Ян Моррис, Роберт Каплан және басқалар да бар.
Осы жыл ішінде «Астана клубы» аясындағы талқылаулар «Үлкен еуразиялық пікірсайысты» қалыптастыру мен ілгерілетуде маңызды алаңға айналды. Клубтың әр отырысы жаңа қалыптасып келе жатқан «Үлкен Еуразия» феноменінің осы және өзге де аспектілеріне арналады. Азия мен Еуропаның саяси-экономикалық, қауіпсіздік мәселелерін кеңінен талдайды.