Алматы қаласы Әуезов аудандық Nur Otan партиясы филиалында партияның «Бақытты отбасы» жобасы аясында көпбалалы және аз қамтылған отбасыларға, сондай-ақ көмекті қажет ететін айрықша жандарға пәтер иелері кооперативі алдындағы қарызын өтеу үшін сертификаттар тапсырылды. Олардың қатарында 14 көпбалалы және аз қамтылған отбасы, 28 жалғызбасты ана мен толық емес отбасы, 19 ерекше көмекті қажет ететін адамдар бар.
– Ауданымызда жеке қабылдау өтіп тұрады. «Асу-Мамыр» пәтер иелері кооперативі тұрғындары келіп, өтініш жазған болатын. Тұрмыстық жағдайлары бойынша олардың су, жылу, электр энергиясына қарыздары бар. ПИК төрағасымен бірге сол шағымдарды қарастырып, қанша көпбалалы отбасы, қанша тұрмыстық жағдайы төмен және мүмкіндігі шектеулі жандар тұратынын зерттеп көрдік. Олардың саны 61 отбасы болып шықты. Осы отбасылар ПИК-ке 5 миллион 600 мың теңгедей қарыз екен. «Асу-Мамыр» пәтер иелері кооперативі төрағасы Бақтыбай Өтегеновпен ақылдаса отырып, сол қарыздарды ішінара кешіруге шешім қабылдадық. Қарыздардың ең төмені 20 мың теңге болса, жоғарысы миллион теңгеден асып жығылады. Сол қарыздар тұрғындарға берілген сертификаттар арқылы кешірілетін болады. Олар алдағы уақытта жылу, су ақыларын уақытында төлеп тұрады деп сенеміз. Қазіргі таңда аудан бойынша тұрғындардың жылу, су, электр қуаты бойынша қарызы 300 миллион теңгеден асқан. Осы қарыздардан құтылу амалдарын қарастырып жатырмыз. Бүгінгі жасалып жатқан шара – сол бастаманың бірі. Тұрғындардың көңілі көтеріліп, қуанып жатыр, – дейді Әуезов аудандық Nur Otan партиясы филиалының төрағасы, аудан әкімі Сайран Сайфеденов.
Осындай көмек алғандардың бірі – Айжан Болатова. Ол бүгінде 4 бала өсіріп отыр. Өкінішке қарай, екеуінің мүмкіндігі шектеулі. 38 шаршы метр пәтерде 8 жан тұрады. Отбасында жұмыс істейтін Айжанның өзі ғана. Ол тұрмыстық жағдайы төмендеп кеткендіктен қарызының көбейгенін айтады. Қазіргі таңда пәтер иелері кооперативіне 250 мың теңге қарыз. Осы қарыздың 100 мың теңгесіне кешірім жасалды. Ол халықтың жағдайына қарап көмек қолын созғаны үшін Nur Otan партиясына айтар алғысы шексіз екенін жеткізді.
Бағдатхан Көпесова да осы жатақхана тұрғыны. 5 баланың анасы. Жалғызбасты. Отбасының ПИК алдындағы қарызы бүгінде 1 миллион теңгеден асып жығылған. Бұл отағасымен ажырасқан 10 жыл көлемінде жиналған қарыз. Алимент алмайды. Соттың шешімі шыққан, бірақ бұрынғы күйеуі осы уақытқа дейін алимент төлемей жүр. Бұл отбасыға 200 мың теңгенің сертификаты табысталды. Бір қуаныштысы, Б.Көпесова көпбалалы ана ретінде пәтер кезегі келіп тұрғанын айтты.
Айта кетейік, бұл іс-шара әлеуметтік жағдайы төмен жандарға арналған. Сондықтан тұрмыс жағдайы жақсы, жұмыспен қамтылған жандар ПИК алдындағы борышын дер кезінде төлеуге тиіс екенін тағы бір еске саламыз.