Оқушылар демалысы елордада «Қазақстан балалары - күзгі интерактив!» ұранымен өтеді. Әр мектепте арнайы іс-шаралар жоспары жасалған, оның шеңберінде құқық қорғау ұйымдарының кеңестері, Қазақстанның жоғары оқу орындары мен колледждеріне виртуалды саяхаттар, челлендждер, танымал спортшылармен кездесулер, 3D модельдеу және робототехника бойынша мастер-тренингтер, қолдан жасалған бұйымдар мен суреттер көрмелері өткізіледі. Карантин шаралары қатаңдатылуына байланысты барлық іс-шаралар онлайн режимде өтеді. Бұл туралы брифинг барысында білім басқармасы басшысы Шолпан Қадырова мәлімдеді.
«20 қазан мен 20 қараша аралығында, яғни күзгі демалыс кезінде білім беру ұйымдарында Дүниежүзілік балалар күніне арналған «Бала құқығы – адам құқығы» айлығы өтеді. Іс-шаралар, бірінші кезекте, құқықтық ақпараттандыруға, оқушыларды шығармашылық және зияткерлік дамытуға, отбасылық құндылықтарды нығайтуға, өмірлік қиын жағдайға тап болған балалар мен отбасылар үшін қайырымдылық іс-шараларын ұйымдастыруға бағытталған», - деп түсіндірді Шолпан Қадырова.
Сондай-ақ 1 қарашада «Дұрыс тамақтану мектебі» жобасы аясында қала мектептерінің оқушылары арасында челлендж іске қосылды, оның негізгі мақсаты - дұрыс тамақтануды насихаттау. Бұл жас ұрпақтың салауатты және мықты болып өсуіне көмектесетін жақсы әдеттер мен дағдыларды қалыптастыруға әсер етеді. Әлеуметтік желілерде барынша тарату арқылы «Бес асыл іс» қайырымдылық челленджі басталады. Іс-шараның негізгі мақсаты-балалардың басқаларға жақсылық жасауға деген ұмтылысын ояту.
«9 қарашада оқушылардың Ұлы Абайдың шығармашылығына қызығушылығын арттыру мақсатымен, «Абайдың Кіші Академиясы» жобасының аясында #besasylis хештегімен «Мен Абайды жырлаймын» челленджі басталады, оның басты міндеті: қарттар мен мұқтаж адамдарға көмек көрсету», - деді Шолпан Қадырова.
Сондай-ақ басқарма басшысы қосымша білім беру ұйымдары күзгі демалыс кезінде өз жұмысын әдеттегідей 10 студенттен аспайтын кезекші топтарда, сағат 9.00-ден 18.00-ге дейін, сондай-ақ онлайн режимде, бекітілген кестеге сәйкес жалғастыратынын атап өтті. Карантин шаралары қатаңдатылғандығына байланысты білім беру орталықтарында орналасқан қосымша білім беру ұйымдары филиалдарының және қоғамдық орталықтардың жұмысы тоқтатылды.
БАҚ өкілдерінің оқушылардың демалысы кезінде мұғалімдердің мектепке баруы міндетті ме деген сауалына Шолпан Қадырова жоқ деп жауап берді.
Еске сала кетейік, бұған дейін
оқушылардың биыл күзгі демалысы 10 күнге созылатынын жазған болатынбыз.