Түркістан облысы Келес ауданында «Фермерлерге бір қадам» акциясы өтті. «Nur Otan» партиясы Келес аудандық филиалы ұйымдастырған науқанға Ошақты ауылдық округі фермерлері мен шаруа қожалық иелері және ауыл шаруашылығы бизнесін бастаймын деген жастар қатысты.
Акцияда партияның аудандық филиал кеңесшісі Н.Айдаров семинар-кеңес түрінде өтетінін, әр сала бойынша аудандық дербес бөлімдер мен мекеме басшылары өз салалары бойынша фермерлер мен шаруа қожалықтарына мемлекет тарапынан көрсетілетін қолдаулар жайлы баяндайтынын, тиісті сұрақтар болса қоюға болатынын жеткізді. Кездесу барысында Келес аудандық кәсіпкерлік және ауыл шаруашылығы бөлімінің басшысы Е.Әбішев асылтұқымды мал өсіруді субсидиялау жайын, ауылшаруашылық техникасының несие көлемі 10 пайызға, техника құны 25 пайызға субсидияланатынын мәлімдеді. Ошақты ауылдық округі әкімдігінің салық инспекторы Т.Орынбаев шаруа қожалықтары, фермерлер мен кәсіпкерлер 2020 жылдан салық заңнама нормаларына байланысты салықтан 100 пайыз босатылатынын айтты. Кәсіпкерлерге қызмет көрсету орталығының маманы Р.Орынбек «Игілік», «Кәсіпкер», «Еңбек», «Қарапайым заттар экономикасы» бағдарламасы аясында мемлекет тарапынан көрсетіліп жатқан қолдау жайын сөз етті. Акцияда шаруалар тарапынан қойылған сұрақтарға толыққанды жауап берілді.А.ЖАСАНҰЛЫ