Әлгі қария Аллаберді Ақшабаев Маңғыстау облысының Жарма елдімекенінде тұрады. Аңшылықты кәсіп еткен қария әлі күнге дейін аң аулап, қақпан құрады.
«Ол кезде ауыл тұрғындарының азығы – даланың аңы. «Мергеннен – сыралғы, батырдан – сауға» демекші, кезінде аңшы алған аңның етін бүкіл ауыл болып бөліп жеген. Бүгінде елдімекеннің тау-тасы, құмына басылған ізді танимын. Алғаш рет аңға 20 жасымда шықтым», – деді Аллаберді Ақшабаев.
Маңғыстау немесе өзге өңір болсын, малға қасқыр шапса, Аллаберді ақсақалды арнайы іздеп келеді. Қақпан құруға келгенде оның қолы епті. «Аңға шықсам, тұла бойым кеңіп сала береді. Қақпан құрмасам да кең даланы бір шарлап келсем болғаны» дейді қарт.
