Қазақстан қысқа дайын болмай шықты. Салдарынан тек еліміздің ірі мегаполисінің көшелерінен ғана көретін көрініс – ғаламат көлік кептелістері енді ұлан-байтақ далада да орнауда. Мәселен, Ақтөбе облысында 200-дей автокөлік қарға малтығып тұрып қалған.
Ішкі істер министрлігінің Төтенше жағдайлар жөніндегі комитеті машиналардың қара жолда қаптап жиналуы олардың қарға батып қалуы кесірінен болғанын растады. Тиісті ақпарат түскеннен кейін жолды қардан тазарту жұмыстары басталған.
«Көлік тығыны» «Батыс Еуропа–Батыс Қытай» халықаралық көлік дәлізінің құрамына кіретін «Самара–Шымкент» автожолының 1 076 (кей деректер бойынша 1 153) шақырымынан бастап, 1 240 шақырымына дейін созылып жатқан көрінеді.
– 2019 жылғы 3 қарашада сағат 18.33-те ТЖД пультіне «Самара–Шымкент» республикалық маңызы бар автожолдың 1 076-1 240 шақырымдары аралығында (Ақтөбе облысының Қарабұтақ кенті ауданында) 196 автомашина қар құрсауында қалды деген хабарлама келіп түсті. 4 қарашада таңертеңнен бері жолдарды тазалау жұмыстары жүргізілуде. «Қазақавтожол» ЖШС техникасы жұмылдырылған. Жағдайды бағалау және эвакуациялауға мұқтаж адамдарды анықтау үшін аудандық полиция, төтенше жағдайлар және орталық аудандық аурухана бөлімінің 3 бірлік техникасы мен 9 адамы, сондай-ақ 8 өтімділігі жоғары техника жіберілді. Нәтижесінде, 7 стационарлы жылыту пункті орнатылды, оған эвакуацияланған адамдар жеткізілуде. Барлығы 31 адам эвакуацияланды, – деп мәлім етті Төтенше жағдайлар комитеті.
Кешке қарай «Самара-Шымкент» автожолынан, атап айтқанда 1 076-1078 шақырымындағы телімінен, Қалыбай кенті тұсында 50 автокөлік, соның ішінде 20 жеңіл және 30 жүк машинасы қар «қақпанынан» құтқарылды. 96 автокөлік өздігінен жолға шыққан.
Алайда ресми мәлімет бойынша Калинин кенті бағытында, яғни «Самара–Шымкент» автожолының 1 132 шақырымында шамамен 50-дей автомашина қар астында жатыр.
Ақтөбе облысы ТЖД-да жедел штаб құрылды. 8(7132) 24-75-29 нөмірі бойынша «қауырт желі телефоны» жұмыс істейді. Барлық әлеуметтік желі түрлерінде жабық жатқан жолдарға шығуға тыйым салынғаны туралы ақпарат жіберіліпті.
Бұл ретте жалғыз Ақтөбе ғана емес, Қызылорда облысында да жолдар жабылуда.
Бұдан бөлек, ТЖ комитетінің жедел тобы Қарағанды облысының бірқатар қаласы мен елді мекендерін тексеріпті. Тексерумен Жезқазған, Балқаш, Қаражал қалалары, Жәйрем, Атасу, Ақтоғай және Ақсу-Аюлы кенттері қамтылды.
Ал 2019 жылы 5-6 қараша аралығында бүкіл елімізде қысқы кезде төтенше жағдайларды жою бойынша іс-қимылдарға азаматтық қорғау мемлекеттік жүйесінің басқару органдары мен күштерін даярлау мақсатында «Қыс-2019» республикалық командалық-штабтық оқу-жаттығулар өткізілетін болды.
Кең ауқымды оқу-жаттығулардың басшылық штабы Қарағанды қаласының ТЖД Дағдарыс орталығында орналасады. Барлық ақпарат соған келіп «құйылмақ». «Қыс-2019» оқу-жаттығулары аясында Қазақстандағы ТЖ-ны жою іс-әрекеттері пысықталып, авариялық-құтқару қызметтері және азаматтық қорғау құрамалары арнайы-тактикалық жаттығулар өткізеді.
Елдос СЕНБАЙ