Мұржалардан түтін будақтап, пештер жағыла бастағалы елде көп баспана отқа оранған. Жылда осы: жылыту маусымы Қазақстандағы баспанасыздық проблемасын ушықтыра түседі. Төтенше жағдайлар министрлігінің мәліметінше, 1 қыркүйектен бастап тұрғын үй секторында 2 мыңға жуық өрт болды. Яғни, осынша баспана жанып кетті. Өкініштісі, адамдар көз жұмды.
Айтқандай, өртпен күресушілер алдын ала қимылдап, биылғы 15 тамыз бен 15 қыркүйек аралығында ауыл-аймақта пештерді орнату кезінде өрт қауіпсіздігі талаптарын түсіндіруге бағытталған «өрт қауіпсіздігі айлығының» І кезеңін ұйымдастырған. Үйлерді аралаған. Содан 20 қыркүйекте қайта оралса, көп үйде бұрын анықталған ереже бұзушылықтар сол қалпы қалғанына куә болыпты. – Жылыту маусымы басталғалы, яғни 1 қыркүйектен бері тұрғын үй секторында 1 761 өрт болды. Салдарынан 47 адам мерт болды. Өрт туындамаса да, улы газбен уланған 7 адам қаза тапты, – деді ТЖМ ресми өкілі Талғат Уали. Алаңдатар жайт: өткен жылыту маусымының ұқсас кезеңімен салыстырғанда өрттер саны 7,3%-ға өскен. Ал өрттен келген өлім-жітім 9,6%-ға, улы газбен уланудың өлім-жітімі 30%-ға төмендеді. 2020-2021 жылдары жылыту маусымының екі айдан сәл астам кезеңінде өрт салдарынан 55 адам, иіс тию себебінен 51 адам зардап шекті. Т.Уәлидің айтуынша, өткен жылыту маусымының ұқсас кезеңімен салыстырғанда өрт кезінде жарақаттанғандардың 12,2%-ға және улану нәтижесінде жарақаттанғандардың 13,3%-ға өскені байқалады. ТЖМ мамандары тексеру барысында 45 мың үйде 83 мыңнан астам өрт қауіпсіздігі талаптарын бұзушылықты анықтады, оның 33 мыңы сол жерде жойылды. Қайта тексеру кезінде 132 үйге иелері кіргізбей қойыпты. 604 үйде иелері болмаған. 16 мың үйде ереже бұзушылықтар әшкереленді.Елдос СЕНБАЙ