Қазақстан Президенті Ақордада Өзбекстанның Өлий Мәжіліс Сенатының төрағасы Танзила Нарбаева мен бала құқықтары жөніндегі уәкіл Аружан Саинды қабылдады. Кездесу барысында өзекті мәселелер талқыланды.
Танзила Нарбаевамен өткен кездесуде екі ел арасындағы мәдени-гуманитарлық қарым-қатынас пен көлік транзит байланысы сөз болды. Сондай-ақ мемлекеттер арасындағы сауда-экономикалық байланысты нығайту жайы айтылды.
– 2018 жылы сауда айналымы 2,5 миллиард долларды құрады. Ал биылғы 9 айдың өзінде өткен жылғы нәтижеден артық жетістікке жетіп отырмыз. Соған сәйкес, жыл соңында Қазақстан мен Өзбекстан арасындағы сауда айналымының көлемі де арта түседі, – деді Қасым-Жомарт Тоқаев.
Танзила Нарбаева Қасым-Жомарт Тоқаевқа қонақжайлық танытқаны үшін алғыс айтып, Шавкат Мирзиёевтің сәлемін жеткізді.
– Сіздің Қазақстан Президенті лауазымына сайлануыңыз бұған дейінгі абыройлы қызметіңіздің нәтижесі. Сіз тәжірибелі дипломат, ықпалды басшы ретінде Тұңғыш Президент Нұрсұлтан Назарбаевтың Қазақстанның мемлекеттік қауіпсіздігін нығайту және экономикасын дамытуға бағытталған бастамаларын жалғастырып келесіз, – деді ол.
Кездесу соңында Мемлекет басшысы Өзбекстан президентіне ізгі тілегін жолдады.Бала құқықтары жөніндегі уәкілмен кездесуде балалардың денсаулығын сақтау мен әлеуметтік қорғау, сондай-ақ кәмелет жасына толмаған жасөспірімдерге зорлық-зомбылық көрсетуге қарсы күрес секілді өзекті мәселелер қозғалды.
Аружан Саин шала туған әрі ретинопатия ауруына шалдығу салдарынан зағип болған сәбилердің проблемасын көтерді. Республика бойынша орта есеппен 20 мыңға жуық бала шала туады. Оның ішінде 4 мың баланың салмағы жетілмей дүниеге келеді. Бала құқықтары жөніндегі уәкілдің айтуынша, аталған мәселені шешу үшін өңірлердегі перинаталды орталықтар мен перзентханалар базасында тиімді офтальмологиялық жәрдем беру жұмысын ұйымдастыру қажет, сонымен қатар жергілікті атқарушы органдармен сапалы байланыс орнатып, диагностикалық құралдармен жабдықтап, медицина қызметкерлерінің біліктілігін арттыру керек.
Қасым-Жомарт Тоқаев бала құқықтары мен денсаулығын сақтау ісі аса маңызды екеніне тоқталып, бұл мәселені әрдайым өзі жіті бақылап отыратынын атап өтті.
