Ақтөбе облысында бір аптада 11 той иесіне 7 миллион теңгеден астам айыппұл салынды. Мұның өңірдегі коронавирус жағдайына әсері бар. Өйткені өткен тәулікте 10 адамның індет жұқтырғаны анықталған. Оның алтауы – қала тұрғыны.
Облыстың бас мемлекеттік санитарлық дәрігері Нұрсұлу Беркімбаеваның мәлімдеуінше, инфекция жұқтырғандардың төртеуі – зейнеткерлер. Оның айтуынша, олар қонаққа барып, дүкен аралағаннан індетке іліккен. Қазір 263 ақтөбелік үй карантинінде жатыр.
«3-9 қараша күндері аралығында мейрамханаларда 11 той өткізілген. Оларға 7,2 миллион теңгеге айыппұл салынды. Қазір облыста эпидемиологиялық ахуал тұрақты. Егер біз бетперде тағып, арақашықтықты сақтасақ, жағдай қалыпты болады. Сондай-ақ өңірде оқушылардан COVID-19 анықталмады. Оқушы саны 300-ден аспайтын мектептер дәстүрлі оқу тәртібіне көшеді. Қазір қаулы дайындалып жатыр», – деді Нұрсұлу Беркімбаева.
Қанша жазалау шарасы жүріп, айыппұл салғанымен, өңірлерде той тоқтамай тұр. Дәрігерлер індетті жұқтыру ошағы той мен адам көп шоғырланған жер дегенімен халық құлақ асар емес.
А.ЖОЛДАС
