Елбасы төрағалығымен «Самұрық-Қазына» ұлттық әл-ауқат қорын басқару жөніндегі кеңестің отырысы өтті. Жиын барысында «Самұрық-Қазынаны» инвестициялық холдингке айналдыру мәселесі қаралды. Сондай-ақ пандемия кезеңінде отандық өндірушілерді қолдау шаралары пысықталды.
– Отырысымыз өте қиын кезде өтіп отыр. Аса ірі елдер арасында бәсекелестік те, тайталас та өршіп барады. Қазақстан экономикасы үлкен қысымның астында қалады. Сонымен бірге бұл бізге жаңа экономикалық модельді құру үшін қажетті реформаларды жүргізуге мүмкіндік береді, – деді Қазақстанның Тұңғыш Президенті. Қорды қайта құру мәселесін талқылау барысында Нұрсұлтан Назарбаев тиімсіз инвестицияларды қысқартудың және оны анағұрлым көп табыс әкелетінімен ауыстырудың маңызын нұсқады. – Басты мақсатты біз қордың 2028 жылға дейінгі жаңарған Даму стратегиясында анықтадық. Оның бастысы – «Самұрық-Қазына» қорын ортамерзімді перспективада инвестициялық холдинг ретінде жұмыстың жаңа форматына көшіру. Біз қордың портфелін географиясы бойынша да, активтер салалары бойынша да әртараптандыруымыз қажет. Тиімсіз инвестициялардан арылып, оны мейлінше табыстыларымен ауыстырған жөн. Бұл – қордан түсетін дивидендтердің өсуі есебінен бюджет түсімдерін арттыруға мүмкіндік береді, – деді Елбасы, «Самұрық-Қазына» ұлттық әл-ауқат қорын басқару жөніндегі кеңестің Төрағасы. Ол дағдарыс жағдайында ел Үкіметіне отандық бизнесті қорғау үшін теңдессіз шаралар қабылдауға тура келіп жатқанына назар аудартты. – Төтенше жағдай кезеңінде халық пен бизнесті қолдауға бағытталған дағдарысқа қарсы шаралардың 3 топтамасы қабылданды. Алайда пандемия кері шегінер емес. Оның екінші толқыны елді жабатыны болжануда. Осы орайда бұрын айтқанымдай, отандық кәсіпкерлерді қолдау аса маңызды, – деді Н.Назарбаев. «Самұрық-Қазына» ұлттық әл-ауқат қорының басқарма төрағасы Ахметжан Есімовтің қазақстандық өндірушілерді қолдау шаралары туралы баяндамасын тыңдаған Тұңғыш Президент бизнес белсенділігі күрт құлдыраған қазіргі шақта мемлекеттік тапсырыс пен квазимемлекеттік сектордың сатып алулары өнеркәсіптік кәсіпорындарға көмектесудің тиімді шарасына айналып отырғанын еске салды. – 2018-2019 жылдары қордың сатып алуларының 93%, яғни 4 200 позиция бойынша 1 триллион теңгеден астам сома бәсекелі ортаға тапсырылды. 23 мыңға жуық кәсіпкерлік нысаны сатып алуларға тікелей қол жеткізе алды. Осы кезеңде бір көзден сатып алуға арналған негіздер 60%-ға кемітілді. Бұл сатып алулар қорытындысы бойынша 400 миллиард теңгеден астам қаражаттың үнемделуіне әкелді. Осы жұмысты жалғастыру керек, – деді Нұрсұлтан Назарбаев. Кеңес барысында «ҚазМұнайГаз», «Қазақстан темір жолы», «Қазатомөнеркәсіп» ұлттық компаниялары, «Қазақтелеком», «Самұрық-Энерго» және Air Astana акционерлік қоғамдары басшыларының есептері тыңдалды. Елбасы қордың Даму стратегиясын тиімді жүзеге асыру қажеттігін нықтады. – Маңыздысы сол, барлық компаниялар әлеуметтік тұрақтылықты сақтауда, өз жұмыскерлеріне қамқорлық жасауда, стратегиялық тұрғыдан шешуші салалардағы кәсіпорындардың орнықты қызметін қамтамасыз етуде. Өндірістік персоналды барынша сақтап қалу қажет. Бұл жерде 340 компания және 300 мың адам жайында сөз болып отыр. Импортқа тәуелділікті төмендету бағытында жұмыс жүргізілді. Қор үлгісінде біз отандық бизнесті белсенді қолдауға үйрендік, – деп сөзін түйіндеді Қазақстанның Тұңғыш Президенті Н.Назарбаев.Айхан ШӘРІП