Риэлторларға қойылатын талап күшейеді – Асқар Мамин

Бұл туралы Сенат депутаттарының сауалына орай Премьер-министр Асқар Мамин айтты, – деп жазады «Қазақпарат».

«Бүгінде риэлторлық қызметке Кәсіпкерлік, Азаматтық және Салық кодексі, «Жеке кәсіпкерлік туралы», «Жылжымайтын мүлікке құқықтарды мемлекеттік тіркеу туралы», «Тұрғын үй қатынастары туралы» және «Жарнама туралы» заңдар қолданылады. Алайда риэлторлық қызмет саласын реттейтін қолданыстағы құқықтық база біліксіз және заңсыз жұмыс істейтін риэлторларды анықтауға толық мүмкіндік бермейді. Осыған байланысты 2018 жылы Қазақстанның Біріккен риэлторлар қауымдастығы Ыстамбұлда Еуразиялық экономикалық ынтымақтастық ұйымының риэлторлық қызметтегі бірыңғай ұлттық стандарттар туралы конвенциясына қол қойды», – деді Асқар Мамин.

Оның айтуынша, 2019 жылы Техникалық реттеу және метрология комитетінің «Қазақстан стандарттау және сертификаттау институты» РМК тізілімінде салалық техникалық комитет тіркелді. Комитет міндеттеріне риэлторлык қызмет нарығында кәсіби стандарттарды енгізу, іске асыру кіреді.

«Биыл жылдың соңына дейін риэлторлық қызметке қажетті талаптар көзделетін ұлттық стандартты қолданысқа енгізу жоспарланған. Осы салада жұмыс істейтін мамандар аталған ұлттық стандарт бойынша оқудан өтеді және тиісті сертификат алады. Осылайша, ұлттық стандарттарды енгізу азаматтарды білікті емес қызметтерден қорғауға мүмкіндік береді. Дамыған елдерде (Ұлыбритания, Испания, Бельгия, Нидерланды және басқалары сияқты) риэлторлық қызмет нарығын реттеу функциялары жосықсыз қатысушылар үшін кедергілер белгілейтін өзін-өзі реттейтін ұйымдарға берілгенін атап көрсетеміз. Осы фактіні ескеріп, қазіргі уақытта мүдделі мемлекеттік органдар халықаралық тәжірибені ескере отырып, риэлторлық қызметті өзін-өзі реттеуді енгізу мәселесін қарап жатыр», – деді Асқар Мамин.

Байқау айқын
Байқау айқын
Aikyn.kz | Бүгінгі жаңалықтар. Әлем және Қазақстан жаңалықтары.