Алматы облысының полицейлері адам бопсалаумен айналысқан қылмыстық топты қолға түсірді.
Алматы облысы полиция департаменті экстремизмге қарсы күрес басқармасының қызметкерлері Балпық би кентінің 28 жастағы тұрғыны бопсалаумен айналысып, жастарды қорқытып, олардан ақшалай алым жинайтыны туралы жедел ақпарат алды.
18 жастағы жәбірленушінің айтуынша, бейтаныс адам аудан орталығындағы сауда үйінде өзін жергілікті «Беделдімін» деп таныстырып, қорқытып, зорлық көрсетіп, бір апта ішінде белгілі бір соманы тауып беруді талап еткен.
Ал егер полицияға жүгінсе, кез келген жерде оған қылмыскерлер маза бермейтінін айтып, өзінің қылмыстық ортада үлкен байланысы бар екенін түсіндірген.
Сол жерде жәбірленушінің телефон нөмірін жазып алған. Бірнеше күннен кейін жәбірленушіге қоңырау шалған 23 және 29 жастағы екі адам бопсалаушы талап еткен қаржыны алып кеткен.
Аталған дерек бойынша ҚР Қылмыстық кодексінің 194-бабы 1-бөлігі бойынша сотқа дейінгі тергеу амалдары жүргізілуде. Барлық күдіктілер ұсталды.
Негізгі күдіктінің бұған дейін бұзақылық пен ұсақ бұзақылық жасағаны үшін екі рет жауапкершілікке тартылғаны белгілі болды.
Ұсталғандардың осыған ұқсас өзге де қылмыстарға қатысы бар-жоғы тексеріліп жатыр.
