Ауыл шаруашылығы – экономиканың негізгі тірегі. Бұл сала да мемлекеттің ерекше қолдауына ие. Қазіргі кезде шаруашылығын өркендетемін деген кез келген азамат мемлекеттік бағдарламалар арқылы кәсібін дөңгелете алады. Жуырда «Nur Otan» партиясы Алакөл аудандық филиалы төрағасының бірінші орынбасары Қайрат Көкебаев аудандағы шаруасы шалқыған шаруа қожалықтарын аралап, олардың тындырымды жұмысымен танысты.
Қожалық басшысы Рыскелді Айманбетовтің іссапарға кетуіне орай шаруашылық жұмысымен қожалық жұмысын реттеуші Назымбек Мырзалиев таныстырды.
Өңірдегі ірі шаруашылықтың бірі – «Ырыс». Бұл шаруашылықтың негізгі кәсібі – Зеңгі баба төлін өсіру. Бүгінде «Ырыс» шаруашылығында 1 000 бас мүйізді ірі қара бар. Оның 200 басы бордақыға орналастырылған. Шаруашылық жұмысын дөңгелету үшін 6 пайыздық мөлшермен 100 миллион теңге несие алған. Шаруашылық жемшөпті өздері даярлайды, сол үшін де 15 адамды жұмыспен қамтып отыр. Бұдан бөлек, мемлекеттен 3 миллион субсидия алады. Бір қызығы, шаруашылық бүгінде ет өнімін базар бағамынан төмен бағамен өз сауда нүктелерінде сатады. Жылына 130-150 тонна ет өндіретін қожалық дайын өнім өндіруді де қолға алмақ.
– Мал шаруашылығы – қазақтың ата кәсібі. «Асық ойнаған азар, доп ойнаған тозар, бәрінен де мал бағып, кәсіп еткен озар» демей ме халқымыз. Шаруа қожалығының өнімін аудан халқынан бөлек, өзге өңірлер де пайдаланады. Себебі «Ырыстың» өнімі базар бағамынан әлдеқайда төмен. Мұндай қожалықтарға қолдау білдіру арқылы ауыл шаруашылығының тамырына қан жүгіртеміз, – деді «Nur Otan» партиясы Алакөл аудандық филиалы төрағасының бірінші орынбасары Қайрат Көкебаев.
Шаруа қожалығы мемлекет қолдауы негізінде өрісін әрі қарай кеңіте түспек. Өйткені қолдау барда өркендеу бар.
Әбілмансұр ЖАСАН