«Астана» арнасы Абай Құнанбайұлының 175 жылдық мерейтойын атап өтуді бірінші болып бастап кетті. Осылайша, арна ұжымы Ұлы ақынның шығармаларын жас ұрпақ бойына сіңіруге, қадір-қасиетін түсіндіруге атсалыспақ.
Телеарна 11 қарашадан бастап жаңа форматкөшіп, стилистикасы өзгерді. Енді, олар жаңа маусымда арнадағы әр бағдарламаның роликтері хәкім Абайдың шығармашылығымен ұштасып, көрермен назарына ұсынылады.
Мәселен, «ASTANA TIMES» атауымен жаңа форматта жаңалық тарататын ақпарат қызметінің жұмысы ұлы ақынның «Сегіз аяқ» өлеңімен астарлас. Қоғамда болып жатқанын әр оқиғаны тілшілері дерек пен дәйекке сүйеніп жеткізеді.
Бұдан бөлек, «мобильді репортер» айдары ашылады. Қандай да бір оқиғаның куәгері таспаны «АСТАНА» арнасының “WhatsApp” немесе әлеуметтік желідегі парақшасына жолдай алады.
Ал «САЯСИ РИНГ» ток-шоуының алаңы жаңарып, келелі келіссөздердің көкжиегі кеңейеді. Сарапшылар қоғамда қызу талқыға түскен саяси, әлеуметтік, экономикалық тақырыптарды таразылайды. «АСТАНА АПТАСЫ» әр сенбі, жексенбінің кешінде аптаның айшықты оқиғаларын саралайды. Сын мен шын «Астана» арнасында.
Телеарна алдағы уақытта әлеуметтік жағынан аз қамтылған, мүмкіндігі шектеулі жандарға қол ұшын созбақ. Осы мақсатта 1 наурыз «Алғыс айту күніне» орай қайырымдылық концерті өтеді. Шарадан түскен қаржы мұқтаж жандардың қажетіне жұмсалады.
«Жыл таңдауы-2019» ұлттық телевизиялық музыкалық жүлдесін енді «Астана» арнасы көрсетеді. Еліміздің жарқын жұлдыздарын бір сахнада тоғыстыратын шара «Алматы Арена» спорт кешенінде 1 желтоқсан күні өтеді.
Сонымен қатар көрерменнің сұрауы бойынша отандық телехикаялардың жаңа желісін ұсына отырып, талабы биік, талғамы зор көрермен назарына аты әлемге мәшһүр «WARNER BROS.PICTURES» кинокомпаниясы мен Кеңес киносының алтын қорына енген кино туындылар мен түріктің үздік үштігіне енген телесериалдар жол тартады.
