Шымкент қаласындағы Тауарлар мен көрсетілетін қызметтердің сапасы мен қауіпсіздігін бақылау департаментінің мамандары жуырда қайтыс болған 2 бүлдіршінге қатысты осындай тұжырым жасады.
Естеріңізге сала кетейік, өткен аптада Шымкент қаласында төтенше оқиға орын алып, бір отбасы түгелге жуық уланып қалған болатын. Салдарынан отбасындағы кішкентай 4 жасар және 10 айлық сәби жарық дүниемен хош айтысқан-ды. Алайда бұл оқиғаның газдан не болмаса дүкеннен сатып алынып жартылай дайын тұшпарадан болғанын ешкім де нақ басып айта алмай отырған еді. Бұл туралы газеттің өткен нөмірінде «Салғырттық пен салақтық: екі сәбидің өліміне кім кінәлі?» деген тақырыпта мақала жазғанбыз. Онда мәселенің мән-жайын айта келіп, бала өлімінің себебі анықталмай отырғанын жеткіздік. Төтенше жағдайлар департаменті улануды газдан емес десе, ал санитарлық-эпидемиялық орталық мамандары тамақтан болу қаупі бар деп саралау жұмыстарына кірісіп кеткен болатын.
Шымкент қалалық тауарлар мен көрсетілетін қызметтердің сапасы мен қауіпсіздігін бақылау департаментінің мамандары тұшпарадан болуы мүмкін деген сөзді жоққа шығарды. Департаменттің баспасөз қызметінің мәлімдеуінше, 3 бағытта жұмыс істеген мамандар жан-жақты зерделеу жұмыстарын жүргізген. Оның біріншісі, «тағамнан уланды ма?» деген сұрақ бойынша оқиға орнынан тамақ қалдықтары мен сүртінділер және дүкеннен тұшпара сынамасы алынып зерттелген. Зертханалық тексеру нәтижесінде, астан улануға әкелетін себеп табылмаған.
Ал екінші бағыт бойынша токсикологиялық улану бар-жоғын анықтау мақсатында аталған пәтердің жабық бөлме ауасынан ауыр металл мен сынаптарға зерттеуге сынамалар алынған. Алайда зерттеу нәтижесі бойынша улануға алып келетін заттар анықталмапты.
Үшіншісі, медициналық қызметтің сапасы. Бұл туралы қорытынды мәлімет медициналық қызмет сапасын тексеру жұмыстары аяқталғаннан кейін белгілі болмақ.
Айта кетейік, пәтерде отбасынан бөлек туыс әпкесі де тұрады. Оның денсаулығына байланысты шағым болмаған.
Иә, сонымен жау тұшпарадан келмепті. Токсикологиялық улану да анықталмаған. Ендігі қорытынды ақ халаттылардың қызмет сапасына тіреліп тұр. Алайда медицина қызметкерлерінің қолына түскенге дейінгі қауіпсіздік шараларына жауаптылардан қайран болмайын деп тұр. Шымкент қалалық төтенше жағдайлар департаментінің баспасөз қызметі сот-медициналық сараптаманың қорытындысы шықпай, еш нәрсе айта алмаймыз деп отыр. Дегенмен оқиға орын алған үйде орталықтандырылған газ жүйесі болмағандықтан, бұл отбасы тамақ пісіру үшін газ баллонын қолданады екен. Сонымен қатар жатақхана үлгісіндегі үйде тұратын отбасы газ баллон тұрған бөлмеде ұйықтайтын болған. Демек, токсикологиялық улану болуы да мүмкін. Отбасындағы ең жас нәрестелер қайтыс болды. Олардың ағзасы әлі жетіліп үлгермегендіктен, улы заттарды тез қабылдайтынын да ескерген жөн. Ал ақ халаттылардың Гиппократ антына адал болғанын немесе аманатты аттап кеткенін қорытындыдан білеміз.
Назгүл НАЗАРБЕК,
Шымкент қаласы